УИХ дахь Хуульзүйн байнгын хорооны хуралдаан яг одоо Төрийн ордонд үргэлжилж байна. Хуралдаанаар гурван асуудал хэлэлцэхээр төлөвлөсөн бөгөөд хэлэлцэх асуудлынхаа хоёрыг л яг одоо хэлэлцээд байгаа юм.
Энэ өдрийн хуралдааны эхний хэлэлцэх асуудлын үеэр буюу Засгийн газраас энэ сарын 1-нд УИХ-д өргөн мэдүүлсэн Монгол Улсын эдийн засаг нийгмийг 2014 онд хөгжүүлэх үндсэн чиглэлийн хэрэгжилтийг хэлэлцэх үеэр УИХ-ын гишүүн Ц.Нямдорж, Шүүхийн Ерөнхий зөвлөлийн дарга Н.Лүндэндорж нарын дунд тун ширүүн маргаан өрнөсөн юм.
Тодруулбал, Ц.Нямдорж гишүүн хуралдааны үеэр нэлээдгүй ноцтой асуудал гэж хэлж болох шүүгчийн цалингийн зөрүүтэй асуудлыг хөндөж ажлаа хийхгүй атлаа гурван сая хүртэлх төгрөгийн цалин авч байгаа асуудлыг эргэж харах ёстой гэсэн саналыг хэлсэн юм.
Харин Н.Лүндэндорж дарга “Та улстөрч хүн байж ийм болчимгүй зүйл ярьж болохгүй. Шүүгчид хуулиас гадуур цалин аваагүй. Та энэ бүхнийг мэдэж байгаа атлаа ингэж ярьж болохгүй” хэмээн бухимдахад харин Ц.Нямдорж “Чи тэгвэл хэн юм. Энэ суудалд суух хүн мөн бил үү. Гурван бүхэл гарсан шал согтуу явж байхдаа чи хүн чирч алаа биз дээ. Тэгээд чи энэ суудалд тохирох хүн мөн юм уу” хэмээн тэрүүхэндээ томхон маргаан үүсгэж чи, би-дээ хүрцгээсэн юм.
Ийнхүү хэлэлцэх асуудлынхаа эхнээс маргаан дагуулж байгаа Хуульзүйн байнгын хорооны хэлэлцэх гуравдах асуудал нь олон жилийн турш маргаан дагуулсан Казиногийн тухай хуулийн төсөл байгаа юм.
Эх сурвалж: www.mminfo.mn