Галт тэрэг хөдөлжээ. Монголын эдийн засгийн хөдөлгөгч хүч болж буй Хоёр толгойн асуудал эхнээсээ шийдэгдэж, тохиролцоонд хүрчээ. Ерөнхий сайд Ч.Сайханбилэг "Рио Тинто”-гийн гүйцэтгэх захирал Сэм Уолштай уулзаж, харилцан ашигтай тохиролцоо хийсэн тухайгаа телевизээр хийсэн мэдэгдэлдээ дурдсан. Тэгвэл уг тохироо ажил хэрэг болж буй бололтой. Өчигдрийн Засгийн газрын хуралдаанаар Оюутолгойн талаар авах зарим арга хэмжээг хаалттай хэлэлцсэн гэх мэдээлэл байна.
Хэвлэлээр гарч буй мэдээллээр бол Засгийн газар Рио Тинтотой “Эвлэрлийн гэрээ” байгуулж, гарын үсэг зурах эрхийг “Эрдэнэс МГЛ” компанийн захирал Б.Бямбасайханд олгосон байна. Энэ гэрээгээр Оюутолгой компани, Монголын татварын албаны хоорондох 30 сая ам.долларын маргааныг хүчингүйд тооцож, тэглэх гэнэ. Анх уг маргаан 130 сая доллар төлөх ёстой гэж гарч байсан бөгөөд Татварын маргаан шийдвэрлэх алба хэлэлцээд 30 сая доллар болгосон юм.
Мөн энэ талаар УИХ-ын гишүүн С.Ганбаатар өөрийн байр сууриа илэрхийлжээ. Тэрбээр “Ерөнхий сайд Ч.Сайханбилэг Рио Тинтотой Эвлэрлийн гэрээ гэгч үг дуугүй бууж өгөх, тулган шаардалтын бичигт гарын үсэг зурлаа. Ингэснээр Рио Тинтогоос авах ёстой байсан 130 сая ам.долларт буулт хийж байна. Энэ нь цаашид бид татварын тал дээр Рио Тинтогийн өмнө үргэлж буулт хийнэ гэсэн үг” хэмээн мэдэгджээ.
Зарим эх сурвалжийн өгч буй мэдээллээр Рио Тинто Оюутолгойн далд уурхайд хоёр тэрбум ам.долларын хөрөнгө оруулалт хийхээр болжээ. Үүний хариуд татварын өрийг тэглэх шаардлагыг тавьсан бололтой.
В.Бат