Тавантолгойн гэрээний төслийг УИХ-ын даргад ЗГХЭГ-ын дарга С.Баярцогт өргөн мэдүүллээ. Тэрбээр гэрээний төслийг өргөн мэдүүлснийхээ дараа сэтгүүлчдэд мэдээлэл хийсэн юм. ЗГХЭГ-ын дарга С.Баярцогт:
-Үндсэн хуулийн дагуу хууль санаачлах эрхтэй 78 субъектийн санаачилсан хууль тогтоолын төслийг УИХ-ын Тамгын газар УИХ-д өргөн барихаас өмнө хянаж шалгадаг. Хуулийн дагуу 72 цагийн дотор хянах ёстой. УИХ-ын Тамгын газрын Ерөнхий нарийн бичгийн дарга Б.Болдбаатар 6 төрлийн бичиг баримтыг ойлгомжтой болгож өгөөч гэдэг хүсэлтийг ЗГХЭГ-т ирүүлсэн. Энэ дагуу хоёр асуудлыг нь Засгийн газрын хуралдаанаар хэлэлцэн, 150, 151 дүгээр тогтоолыг гаргасан. Ингээд гэрээний төслийн иж бүрдлийг бүрдүүлсэн тул өнөөдөр УИХ-ын даргад мэдүүлж байна.
Тавантолгой”-н нүүрсний ордыг хөгжүүлэх талаар УИХ-ын тогтоолын төслийг өргөн барьсан. Хөрөнгө оруулалтын гэрээг мөн өргөн барьсан. Хөрөнгө оруулалтын гэрээний хавсралт Ашиглалтын тусгай зөвшөөрөл, Хамтын ажиллагааны гэрээ, Хамтын ажиллагааны төлбөрийн тооцоолол, Газартай холбоотой тооцооллын томъёо, Ухаа худаг-Гашуун сухайтын төмөр замын концессийн гэрээг хавсаргасан. Тавантолгойн нүүрсний ордыг хөгжүүлэхтэй холбоотой төсөв санхүүгийн зардлын тооцоо, мөн төслийн талаар төрийн бус байгууллагуудаас ирсэн санал болон Засгийн газрын 150, 151 дүгээр тогтоолуудыг өргөн барьсан байгаа. Ирэх долоо хоногоос чуулганаар хэлэлцүүлнэ” гэв.
Н.Энх