УИХ-ын гишүүн сайдын ал­ба давхар хашихыг хамгийн их эсэр­гүүц­сэн хүн бол УИХ-ын гишүүн Р.Бурмаа. Давхар дээлээр дайн зарлах шахаж, намаасаа хөөгдөж тууг­даж байсан нь ч саяхан. Намынхаа бүлэг дээр уйлан хайлан байж давхар дээлтнүүддээ агсч байсан эрхэм хатагтай нэг л өдөр давхар дээл нөмөрч орхисон.

Мэл гайхаж цэл хөхрөхөөр шийдвэр байсан ч ард түмэн сайд болсон даруйдаа гишүүнээсээ татгалзах болов уу гэж харж байсан ч одоо мөрдөж байгаа хуульдаа таарууллаа хэмээн хэнэггүйхэн тайлбарлаад давхар дээлтэй өнөөдрийг хүртэл давхиж яваа. Гэсэн ч эрхэм сайд Хөдөө аж ахуйн салбарыг ёстой жинхэнэ утгаар нь самарч яваа сурагтай. Тариаланчидтай “чи би”-дээ хүрч явсан тэрбээр саяхан түймрийн голомтод ажиллаад иржээ.

Гэвч учир мэдэх нэгний яриагаар бол Дорнодод нэр дэвших бэлтгэлээ базааж, Дорнодын Баян-Уулаар очиж баахан зургаа даруулаад ирсэн бололтой. Сонгуулийн шоундаа гал ашиглах гэсэн эрхэм гишүүн маань өнөөх сумынхаа нэрийг аймагтайгаа андуурч дуудаад баллаж тавьсан сурагтай. Хэвлэлийнхнийг цуглуулж мэдээлэл хийхдээ Баян-Уул аймаг хэмээн яриа болгондоо онцолсон сайддаа шадар зөвлөхүүд нь шифи өгсөн ч хуулахаас ичсэн үү, эсвэл аймагтаа хэрхэн нэр хүнд олох бодол нь салахгүй байсан уу, хэвлэлийн турш аймаг гэсээр дууссан гэнэ шүү.

Мөн Р.Бурмаа сайдын бас нэгэн онигоо хэвлэлээр тарж эхэлсэн нь мал аж ахуйг хариуцах манай сайд ботго, тугалаа ялгадаг болов уу гэх малчин өвөөгийн яриа. Өвөөгийн ярианаас санаа авсан сэтгүүлчид малын бэлчээрт хэд хоног ч болов байсан эсэхийг нь намтар түүхээс нь хайгаад ширхэг ч үсэг олоогүй гэнэ лээ. Ай Бурмаа минь. Нэр шигээ ажлаа хийж, нэг ширхэг ч гэсэн зөв шийдвэр гаргахсан даа.

Эх сурвалж: www.mminfo.mn