УИХ-ын даргын захирамжаар Тавантолгойн гэрээний төслийг парламентаар хэлэлцэх эсэхийг шийдвэрлэх ажлын хэсэг байгуулагдсан. УИХ-ын гишүүн Л.Эрдэнэчимэгийн ахалж буй энэ ажлын хэсгийн гишүүд эхнээсээ гарах хүсэлтээ өгөөд эхэлжээ. Гишүүн М.Сономпил гэхэд УИХ-ын даргад албан бичиг илгээж, ажлын хэсэгт орох боломжгүй гэдгээ илэрхийлсэн байна. Тэгвэл өнөөдөр МАН-ын төлөөлөл болох УИХ-ын гишүүн Су.Батболд мөн л ажлын хэсгээс гарах тухай яригдаж эхлэв. Энэ талаар өөрөөс нь тодруулахад тэрбээр "Би ажлын хэсэг байгуулсан захирамж хуульд нийцэж байгаа эсэхэд эргэлзэж байгаа. Өргөн барьсан хууль, шийдвэрийн төслийг хэлэлцэх эсэх асуудлаар байнгын хороод хуралдаж, шийдвэрээ УИХ-д танилцуулах ёстой гэсэн байр суурьтай байна" хэмээн хариулав. Өөрөөр хэлбэл Су.Батболд гишүүн Тавантолгойн гэрээний төслийг байнгын хороод болон УИХ хэлэлцэх эсэхийг шийдсэний дараа ажлын хэсэг байгуулах ёстой хэмээн үзэж буй бололтой.
В.Бат