Өнөөдөр "Зууны мэдээ" сонины Үндэсний мэдээллийн төвд “Глоб” хадгаламж зээлийн хоршооны захирал асан Ж.Мэндбаяр өөрийнх нь холбогдсон гэмт хэргийн талаар мэдээлэл хийлээ.
Учир нь Хадгаламж зээлийн хоршоодын дампуурлын улмаас "Баян-Өндөр сан", "Бизнес кредит", "Бөөн цагаан нуур", "Бүтээн байгуулалт хөгжлийн сан", "Глоб кредит", "Гэр хорооллын барилгажилт", "Европын хөгжил", "Жигүүр инвест", "Зиб", "Итгэл сэтгэл ирээдүй", "Монгол торго", "Нью болор оргил", "Оюу алт", "Си Эм Си", "Хөрөнгө оруулалт хөгжлийн сан", "Эрхэст инвест" зэрэг 29 хоршоо дампуурч, 9300 орчим хадгаламж эзэмшигч хохирсон байдаг. Хохирогчид тэр үед эрх барьж байсан МАХН-ын үүдэнд олон сар өлсгөлөн зарлаж, батлахыг нь урж, үсээ хусч тэмцлээ хурцаар илэрхийлцгээсэн билээ. Үүний хүчинд тэд хохирлынхоо тавин хувийг эргүүлэн авсан ч үлдсэнийг нь одоо хүртэл авч чадаагүй байгаа юм.
Хэвлэлийн хурлын үеэр тэрбээр “2006 оны дөрөвдүгээр сарын 15-ны шөнө 02.00 цаг орчимд УМБГ-аас ажиллагаа явуулж, шүүхийн шийдвэргүйгээр баривчилсан. Баривчлагааны дараа Ж.Мэндбаяртай холбоотой бүх хүний гэрээс хөргөгч, хивснээс эхлээд байшин, барилга, газар гээд бүх хөрөнгийг нь хураан авч, битүүмжилж улсын хөрөнгө болгосон байдаг. Уг хөрөнгө нийтдээ 27 тэрбум төгрөгөөр үнэлэгдэх байсан ч хоёрхон тэрбум болгон үрэгдүүлсэн” хэмээн мэдэгдсэн юм.
Түүнчлэн тэрбээр “ Манай хадгаламж зээлийн хоршоог Төрөөс албадан дампууруулахад нийт 8000 орчим хүн хохирсон байдаг. Мөн Төр өөрөө хохирсон. Учир нь хадгаламж зээлийн хоршооны хохирогчдод хохирлын 50 хувийг буцаан олгосон байдаг. Гэвч Төрд өөрийн гэсэн мөнгө байхгүй. Төрийн мөнгө энэ ард түмний мөнгө шүү дээ. Үүнийг бүгд мэдэж байгаа. Энэ хохирлыг бид төлөх ёстой. Шүүхийн шийдвэр хүчинтэй байгаа. Гэхдээ би бүх ялыг 10 жилийн чанга дэглэмтэй хорих ангид биеэр эдэлсэн. Төлөхгүй ч байж болно. Шоронд дарамт бол байсан. Харин шүүх шинэчлэлийн хүрээнд дарамт байхгүй болсон. Энэ хэргийн улмаас Төр, иргэн, бас би бүгд хохирсон байгаа. Иргэдэд өгөх 10 тэрбум төгрөгийг энэ гурван тал нийлж, хамтарч барагдуулах ёстой. Яаж гэхээр, битүүмжилсэн хөрөнгийг хууль бусаар үргэдүүлсэн этгээдүүдэд хариуцлага тооцож, идэж уусан хөрөнгийг нь гаргуулах хэрэгтэй. Ингэсэн тохиолдолд бид Төрөөс мөнгө нэхэхгүй. Миний хөрөнгийг буцаагаад өгчих, бид нарын хөрөнгийг өгчих” хэмээн ярилаа.
Уг хэрэгтэй холбогдуулан 43 тэрбум 606.5 сая төгрөгийн эд хөрөнгийг битүүмжилсэн ч үүн дээр нэмэгдэх зээлдэгчийн авлагын 14 тэрбум төгрөг, 20 гаруй газар, таван лицензийг үнэлээгүй байдаг юм.
Хохирогчдын эрх ашгийг хамгаалах "Шударга төв" төрийн бус байгууллагын тэргүүн Х.Оюунцэцэг "1937 оны хэлмэгдүүлэлтийн хар сүүдэр одоо хүртэл ард түмний сэтгэлд байсаар байна. Тэр үед хайртай дотны хүмүүсээ алдсан хүмүүс өнөөдрийг хүртэл төрдөө гомдсоор байгаа. Үүн шиг л үйл явдал битгий болоосой гэж хүсч байна. Мөнгөө алдсан хохирогчдоос маш олон хүн сэтгэлээр унаж, амиа хорлож нас барсаар байна. Хохирогчид алдсан мөнгөө өнөөдрийн төгрөгт шилжүүлж авахыг хүсээгүй. Тухайн үед алдсан мөнгөө л тэр тоогоор нь авахыг хүсч байгаа. Энэ асуудлыг яаралтай хэлэлцэж, олон мянган хүнийг сэтгэлийн шаналлаас гаргахыг төр засгаасаа хүсч байна" гэлээ.
Тус байгууллагаас хохирогчдын дунд судалгаа явуулжээ. Судалгаанд хамруулсан 700 хохирогчийн гэр бүлд сэтгэл санааны хямралаас үүдэлтэй нас барсан, амиа хорлосон 59 тохиолдол бүртгэгджээ.
Орон байргүй болсон 480, түрээсийн байраар хоног залгуулж байгаа 405 айл байгаа бол айлаар хэсч амьдардаг 68, ах дүүгийндээ толгой хоргодсоор яваа 45 айл байгаа гэнэ.
Хадгаламж зээлийн хоршоонд мөнгөө хадгалуулах саналыг гэр бүлийнхэндээ анх тавьж, ах дүүсийнхээ мөнгө төгрөгийг цуглуулж, байр саваа зарж мөнгийг нь нэмэрлээд хадгалуулсан ч ийнхүү алдсан иргэд одоо гэр бүлийнхнийхээ дарамтад амьдарч, гэрээсээ хөөгддөг тохиолдол их байгаа юм байна. Үүнээс болж хоёр тийш болсон гэр бүл судалгаанд оролцогчдын 10 гаруй хувийг эзэлжээ.
Хохирогчдын ихэнх нь буюу 311 нь дээд боловсролтой хүмүүс байсан бол үр хүүхдийнхээ мөнгийг алдсан хөгшчүүл олон байгаа юм.
Б.Дэжид