Монгол Улсын Ерөнхийлөгч Ц.Элбэгдорж Япон Улсад ажлын айлчлал хийхээр тус улсыг зорилоо.

Айлчлалын үеэр Монгол Улсын Ерөнхийлөгч Ц.Элбэгдорж Япон Улсын Ерөнхий сайд Ш.Абэ-тай албан ёсны хэлэлцээ хийж, тавдугаар сарын 21-ны өдөр Токио хотноо болох “Азийн ирээдүй” форумд оролцож илтгэл тавих юм байна. Энэхүү арга хэмжээг Японы Никкэй сонин жил бүр зохион байгуулдаг бөгөөд үүнд дэлхийн нөлөө бүхий улстөрч, нийгмийн зүтгэлтнүүд оролцсоор ирсэн юм. Тухайлбал, өнгөрсөн жилүүдэд АНУ-ын Төрийн нарийн бичгийн дарга Х.Клинтон, Мьянмарын ардчилсан хөдөлгөөний тэргүүн Ан Сан Сү Чи зэрэг хүмүүс оролцож байжээ. Энэ онд Монгол Улсын Ерөнхийлөгч Ц.Элбэгдорж гол зочноор уригдан оролцож байгаа юм.

Энэ удаагийн айлчлал нь Япон Улстай Стратегийн түншлэлийн харилцааг гүнзгийрүүлэн хөгжүүлэх, дээд, өндөр түвшний харилцан айлчлалын давтамжийг хадгалах, мөн хоёр талын болон олон улсын харилцан сонирхсон асуудлаар санал солилцоход чухал ач холбогдолтой болно.

Ерөнхийлөгчийн айлчлал энэ сарын 25-ны өдрийг хүртэл үргэлжилнэ.