Украины Ерөнхийлөгч Петр Порошенко “ВВС” агентлаг ярицлага өгсөн тухай “www.dailymail.co.uk” мэдээллээ. Тэрбээр ярилцлагынхаа эхэнд “ОХУ-ын Ерөнхийлөгч В.Путин Украины ард түмнээс уучлалт гуйж, зүүн хязгаарын хямралд буруутай гэдгээ хүлээн зөвшөөрвөл түүнтэй уулзахад бэлэн. Харин уучлалт гуйхгүй, өөрийгөө хамгаалсаар байвал Украин, Оросын харилцаа улам хөндийрөх болно. Бидний уулзалт олон зүйлд цэг тавина гэдэгт итгэлтэй байгаа. Харамсалтай нь Путин өөрийгөө Украины хямралд буруугүй хэмээн мэлзсээр байгаа. Энэ бүхэн надад таалагдахгүй байна” гэж хэлжээ.

Сэтгүүлч түүнээс “Оросыг Украины зүүн хязгаарын хямралд буруутай гэх баталгаа байгаа юу” гэж асуухад тэрбээр “Хангалттай баримт бий. Зүүн хязгаарт Украинчууд амьдардаг. Тэд бол гол гэрчүүд. Тун удахгүй үнэн илрэх болно” гэж хэлжээ. Порошенко, Путин нар өнгөрсөн хоёрдугаар сард Беларусын нийслэл Минск хотноо зохион байгуулагдсан “Нормандын дөрвөл”-ийн уулзалтын үеэр тусдаа уулзсан билээ.

Өнгөрсөн оны дөрөвдүгээр сараас Украины зүүн хязгаарын Луганск, Донецк мужид салан тусгаарлагчид хяналтаа тогтоохыг оролдох болсон юм. Порошенкогийн хүсэлтийн дагуу армийнхан зүүн хязгаарт цэргийн ажиллагаа явуулсан билээ. Олон сар үргэлжилсэн тулааны үеэр 6000 гаруй хүн амиа алджээ.

Б.Дэлгэрцэцэг