Өнгөрсөн даваа гарагийн 06.00 цагаас төрийн өмчит нийтийн тээврийн компанийн жолооч, кондукторууд цалингаа нэмэгдүүлэхийг шаардан, ажил хаялт зарласан билээ.

Энэ хугацаанд “Монгол үйлдвэрчний эвлэлийн холбоо”, компанийн үйлдвэрчний хороо, ажил олгогч нар зөвшилцөхөөр хэд хэдэн удаа уулзаж, ярилцсан боловч тодорхой шийдэлд хүрээгүй, ажил хаялт дөрөв дэх өдрөө үргэлжилж байна.  Харин өнөөдөр ажил хаялтыг эсэргүүцсэн жолооч, кондукторууд хэвлэлийн хурал хийж, ажиллаж, хөдөлмөрлөх эрхээ үйлдвэрчний эвлэлээс шаардлаа.

  Тэд “Зорчигч тээврийн нэгтгэл” ОНӨҮГ-ын жолооч, кондукторууд бид ажил хаялтад оролцохгүй гэдгээ мэдэгдсээр байтал бидний хөдөлмөрлөх эрхийг хязгаарлаж, ажилд гаргахгүй дарамт учруулж байна. Биднийг ажилдаа гарахаар өглөө ирэхэд Үйлдвэрчний эвлэлийн зүгээс зам хааж, дугуйн доор орж хэвтэх, хэл амаар доромжлох зэрэг үйлдлээр дарамтлан, ажил хаялтад хүчээр оролцуулж байна. Ажил хаягчдыг байгууллагын захиргаа, цагдаагийн байгууллага нийлээд ч хүч хүрэхгүй байна. Ажилчдыг хоёр талцуулж, цалин хөлс, нэр хүндийг нь хохироож байгаа Үйлдвэрчний эвлэлийн уваагүй үйлдэл хэрээс хэтэрч байна. Энд  ашиг сонирхол зүйл хүчтэй яригдаж байгаа нь илт харагдаад байна шүү дээ. 25 хувийн нэмэгдэл энэ сарын сүүлийн цалин дээр харагдах байсан. Төр цалинг 25 хувиар нэмнэ гэсэн. Үр дүнг нь харахгүй ажил хаяж байгаа нь ажилчдын биш, Үйлдвэрчний эвлэлийнхний турхиралт” гэв. 

“Автобус 1” баазын жолооч Ж.Ганбаатар “Бид үйлдвэрлэгч байгууллага биш үйлчилгээний байгууллага учраас ажил төрлөө хийж ард түмэндээ үйлчилмээр байна. Гэтэл бидний ажиллах эрхийг хязгаарлаад гурав хоног болж байна. Хэсэг бүлэг хүний турхиралтын дагуу ажил хаячихаад энгийн ажилчид бидэнд үнэхээр саад болж байна шүү дээ. Ажил хийх хүсэлтэй иргэдэд саад болж байна. Бид нар ажлаа хийх гэхээр автобусны доогуур орж хэвтээд янз бүрийн хууль бус үйл ажиллагаа явуулж бидэнд саад болж байна. Одоогийн байдлаар гурав хоног ажиллалгүй цалингаа авч чадахгүй хүрээд байна. Иймээс бид хохирлоо төлүүлэхээр хуулийн байгууллагад гомдол гаргана. Иргэдийн ажлыг хийлгэхгүй байгаа нь бидний эрхийг ноцтой зөрчиж байна. Бид хохирлоо нөхөн төлүүлэхээр хууль хяналтын байгууллагад өгч, шүүхэд нэхэмжлэл гаргана” гэж  ярьсан юм.

Энэ үеэр мөнгө хураагч Ж.Баяртөгсөөс болж буй асуудлыг тодрууллаа.

-Ажил хаялтыг эсэргүүцэж байгаа жолооч, кондукторуудын талаар тэтгэвэртээ гарсан, ажлаасаа халагдсан хүмүүсийг эргүүлэн авчирч, эсэргүүцүүлж байгаа гэсэн мэдээллийг ажил хаягчид өгөөд байгаа шүү дээ. Таны хувьд энэ байгууллагад хэдэн жил ажиллаж байна вэ? 

-Энэ бол зохион байгуулалттай ташаа мэдээлэл. Миний хувьд 11 дэх жилдээ мөнгө хураагчаар ажиллаж байна. Үндсэн цалин маань 400 орчим мянган төгрөг байдаг. Үүн дээр нэмээд цаг, орлогын төлөвлөгөөнөөс шалтгаалаад нэмэгдэл, урамшуулал цалин авдаг. Ойролцоогоор сардаа 800 орчим мянган төгрөг авдаг юм. Тэгэхээр хэн илүү ажилласан, ажилдаа сайн байгаа нь илүү цалин авах шударга тогтолцоо гэсэн үг  шүү дээ. 

-Орлого, цагийн төлөвлөгөө нь замын түгжрэл зэрэг гадаад хүчин зүйлсээс шалтгаалаад барагтай бол биелдэггүй. Төлөвлөгөөндөө хүрээгүй тохиолдолд цалингаа бүтэн авч чаддаггүй гэж ажил хаягчид яриад байгаа. 

-Мэдээж замын түгжрэл нөлөөлдөг л дөө. Гэхдээ бэрхшээлгүй зүйл хаа байгаа  юм бэ. Төлөвлөгөөндөө хүрч ажиллахын тулд хичээх хэрэгтэй. Ямар ч л байсан цагтаа багтаад л яваад байж болдог юм. 

 

Түүнчлэн тэд, "Автобусны жолоочид дунджаар 1.2-1.4 сая төгрөгийн цалинтай үүнээс даатгалын шимтгэлээ төлөөд 850 мянган төгрөгөөс доошгүй цалин авдаг. Бараг цалин авдаггүй гэж худал мэдээлж байгаад харамсч байна” хэмээн онцолж байлаа.

Мөн Зорчигч тээврийн нэгтгэл ОНӨААТҮГ-ын орлогч захирал М.Цэвээн-Очир  “Хэсэг бүлэг хүнээс болж нийтийн эрх ашиг зөрчигдөх ёсгүй. Ажил хаях нь хаяад, ажлаа хаяахгүй ээ гэсэн нь ажлаа хиймээр байна. Гэтэл үйлдвэрчний эвлэлийн гишүүд тэргүүтэй хэсэг хүмүүс бусад хамт олныхоо ажил хийх эрхийг боогдуулж байна. Өнөөдөр жолооч, кондукторууд сая орчим төгрөгийн цалин авдаг. Энэ хүмүүсийн цалинг дахиад хүслээр нь нэмчихвэл 400-500 мянган төгрөгийн цалинтай эмч, багш нар хэрхэх билээ” гэсэн юм.

Хэвлэлийн хурлыг зохион байгуулалттайгаар хийж байна

Монголын тээвэр холбоо, газрын тосны ажилтны үйлдвэрчний эвлэлийн холбооны дарга Б.Рагчаатай утсаар ярин дараах зүйлийг тодруулсан юм.

-Ажил хаяхгүй гэж байгаа ажилчид мэдээлэл хийж, ажлаа хийх хүсэлтэй байгаагаа илэрхийллээ. Ажлаа хийе гэсэн ажилчдыг яагаад шугаманд нь гаргахгүй байгаа вэ?

-1500 гаруй ажилтны 1200 орчим хүн ажил хаялтыг дэмжиж байгаа. Дэмжихгүй байгаа нөхөд нь захиргааны албаны хэдэн ажилтан. Бид зорилгодоо хүрч байж л ажлаа хийнэ гэж жолооч, кондукторууд үзэж байгаа. Цалин нэмнэ гэх сургаар ажил хаялтаа зогсоож, ажилласаар байгаад хүмүүс ямар ч итгэлгүй болсон байна. Тиймээс л ийнхүү ажил хаяж байна гэсэн юм. Өнөөдрийн хэвлэлийн хурлыг зохион байгуулалттайгаар хийж байна. Ажилчдаа хүчээр хэвлэлийн хуралд суулгаж байгаа гэсэн мэдээлэл бидэнд ирсэн. Мөн биднийг эсэргүүцэж мэдээлэл хийж байгаа ажилчдын дунд ажлаасаа гарсан нөхдүүд цөөнгүй байна гэх хариултыг өгч байна.

Б.Дэжид