НАМЗХ-ны удирдлагууд сэтгүүлчдэд мэдээлэл хийлээ. МАН-ын дэргэдэх НАМЗХ-ны V их хурал хоёр хоногийн дараа болно. "Хариуцлагатай залуу, хүчирхэг Монгол" уриатай болох тус их хуралд 458 төлөөлөгч оролцох юм байна.

Н.Номтойбаяр " НАМЗХ-ны V их хурал түүхэн ач холбогдолтойгоос гадна бодлогын хурал болно. 18 жилийн хугацаанд олон мянган залуусыг эгнээндээ нэгтгэж, үйл ажиллагаа явуулж байна. Төрийн бодлогоор Монголын залуусын өмнө тулгамдаж байгаа асуудалд гарц шийдэл олж ажиллах ёстой. Зарим нэг талаараа бид энэ ажлыг төдийлөн сайн гүйцэтгэж ирээгүй. Жил гаруйн хугацаанд 27 мянган залуусыг хамарсан судалгаа хийж, Монголын хөгжлийн хөтөч болсон залууст зориулсан Залуусын хөгжилд дэмжлэг үзүүлэх хуулийн төслийг боловсруулж, УИХ-д өргөн барихад бэлэн болоод байна. Энэ хууль маань залуусын өмнө тулгамдаж байгаа боловсрол, хөдөлмөр эрхлэлт, орон байр гэсэн таван асуудлыг тусгасан. Бид эрийн цээнд хүрч, хариуцлагатай залуус болсны гэрч болгож, хуулийн бодлогын төслөө их хурлын төлөөлөгчдөөрөө хэлэлцүүлж, ирэх долоо хоногт Содбилэг гишүүн бид хоёр УИХ-д өргөн барина" гэсэн мэдээллийг өгөв.