Засгийн газрын зарим сайд нарыг чөлөөлөх хуулийн төслийг өнөөдөр УИХ-ын даргад өргөн барихаар товлосон байлаа. Өдрийн 13.00 цагаас товлогдсон энэ арга хэмжээ хойшлогдсоор 16 цагт болсон юм. УИХ-ын даргын өрөөнд байнгын хороодын дарга нар, АН-ын Ерөнхий нарийн бичгийн дарга Л.Эрхэмбаяр нар ирсэн байлаа.
Харин Монгол Улсын Ерөнхий сайд Ч.Сайханбилэг Засгийн газрын гишүүдийг чөлөөлөх хуулийн төслөөс гадна АН-ын ҮЗХ-г хуралдуулах шаардлагыг УИХ-ын даргад өргөн барьжээ. Тэрбээр шаардлага өргөн барьсаныхаа дараа албан өрөөндөө сэтгүүлчдэд мэдээлэл хийсэн юм. Монгол Улсын Ерөнхий сайд Ч.Сайханбилэг:
-Улс орны эдийн засаг, улс төрийн хүрээн дэх нөхцөл байдлуудыг үнэлэх хэрэгтэй. Гадаад орчинд бид бүхний хувьд уул уурхайн бүтээгдэхүүн, түүхий эдийн үнийн огцом бууралт үргэлжилсээр байгаа. Гадаадаас оруулж ирэх хөрөнгө оруулалтын хэмжээ нэмэгдэхгүй байна. Хөрөнгө оруулагчид дахиад Монголын улс төрийн амьдралтай холбоотой үйл явцыг ажигласан байдалтай байгаа. Дотоод хүчин зүйлүүдийн хувьд энэ жилийн сүүлийн хагаст төсвийн алдагдлыг нөхөх ажлуудаа үргэлжлүүлсээр байна. Цаг үетэй холбоотой ургац хураалт, малын хадлан тэжээл, махны нөөц бэлтгэх, өвөлжилтийг хангах ажил хугацаа харгалзахгүйгээр биднээс шаардаж байгаа юм.
Ийм нөхцөлд бид урагшлах зарчмын асуудал, эрх ашгийн эрэмбийг зөв дараалах асуудал гарч байна. Юуны өмнө улс орны эрх ашгийг, дараа нь улс төрийн намын, хувь хүмүүс, хувь улс төрчдийн эрх ашиг гээд УИХ-ын гишүүн асан С.Зоригийн хэлсэн үгийг санаж байх ёстой. Хамгийн гол нь улс үндэстнийхээ эрх ашгийг хангахын тулд юуны өмнө юу хийх ёстой талаар бодлоо хуваалцъя.
Парламентын сонгодог засаглалтай манайх шиг улсын хувьд УИХ-д байгаа хамгийн олон суудалтай намын дарга нь Ерөнхий сайдын албыг хамт хаших нь улс төрийн тогтвортой байдлыг хангахад чухал үүрэгтэй гэж үзэж байгаа. Ийм саналыг АН-аас, манай бүлгийн гишүүд ч Ерөнхий сайдын хувьд надтай уулзахдаа санал, хүсэлт, зөвлөмжийг хэлж байгаа.
Монгол Улсын Үндсэн хууль, бусад хууль тогтоомжид нийцүүлж, АН-аас гаргасан шийдвэрээ хүндэтгэж миний хувьд дараах шийдвэрийг гаргалаа. 6 сайдыг чөлөөлөх, огцруулах асуудал хуулийн дагуу явах ёстой. Би танхимынхаа сайд нартай уулзсан. Ямар ч байсан 6 сайдыг огцруулах асуудал процессийн дагуу үргэлжлээд явж байна.
Засгийн газрын тухай хуулийн 23.1.1-д заасны дагуу энэ асуудлыг Ерөнхий сайдын хувьд Монгол Улсын Ерөнхийлөгчтэй зөвшилцөх асуудал процессийн дагуу явагдана.
6 сайдын асуудлыг чөлөөлснөөр асуудал шийдэгдэхгүй. Нээлттэй хэвээрээ байсаар байх болно. Тийм учраас намын дарга, Ерөнхий сайд хоёр хамт байх ёстой гэдэг асуудлыг үндсэнд нь шийдэх ёстой. Намрын чуулганаар хэлэлцэх Үндсэн хуульд нэмэлт өөрчлөлт оруулах асуудлыг ч нэгдсэн хариултыг улс орон даяар гаргах ёстой.
Тийм учраас дөнгөж сая УИХ-ын даргад АН-ын даргын хувьд шаардлага хүргүүлсэн байгаа. Энэ асуудлуудаа нэг мөр шийдэх үүднээс ҮЗХ-ны хуралдааныг маш яаралтай зарлаж, УИХ-ын ээлжит бус чуулган эхлэхээс өмнө хуралдуулж “намын дарга, гүйцэтгэх засаглалын тэргүүн хоёр нэг байхаар нэг тийш нь шийдвэрлэх ёстой. Үүнийг ҮЗХ-ны бүрэлдэхүүнээр шийдэх ёстой. АН-ын ҮЗХ-ны бүрэлдэхүүнд УИХ-ын гишүүд, ГЗ-ийн гишүүд гээд улс орон даяар өргөн олон түмэнтэй нүүр тулж явдаг хүмүүс байгаа. Энэ хүмүүс улс орны болон намын хувьд шийдвэрээ гаргах ёстой гэж үзэж байгаа юм гэлээ.
Н.Энх