2015-2016 оны шинэ хичээлийн жил эхлэхэд 20 гаруй хоног үлдээд байна. Харин сургууль, цэцэрлэгүүд "эзэд"-ээ хүлээж авах бэлтгэлээ хэрхэн базааж байгааг нийслэлийн Боловсролын газрын Барилга, хөрөнгө оруулалт хариуцсан мэргэжилтэн Э.Баярмагнайгаас тодрууллаа.
-Сургууль, цэцэрлэгийн засвар хэдэн хувьтай явагдаж байна вэ? Хэзээ дуусах вэ?
-Одоогоор 10 сургууль, цэцэрлэгийн засварын ажил бүрэн дуусаад байна. Ерөнхийдөө засвар үйлчилгээ 60 хувьтай явагдаж байна. Энэ сарын 15 гэхэд засварын бүх ажлыг дуусгана.
-Энэ жил хичнээн сургууль, цэцэрлэгийг засварлаж байгаа вэ? Улс болон нийслэлээс ямар хэмжээний хөрөнгө зарцуулж байгаа талаар мэдээлэл өгөхгүй юу?
-Нийт 32 сургууль, цэцэрлэгт засвар хийгдэж байна. Нийслэлийн төсвийн хоёр тэрбум төгрөгөөр 22 сургууль, цэцэрлэгийн орчинг шинэчлэн сайжруулж байна. Мөн улсын төсвийн 745 сая төгрөгөөр 10 сургууль, цэцэрлэгт засвар үйлчилгээ хийгдэж байгаа.
-Шинээр хичнээн цэцэрлэг ашиглалтад орох вэ?
-Сүхбаатар дүүргийн хөрөнгөөр баригдаж буй 240 хүүхдийн шинэ цэцэрлэг энэ хичээлийн жилд ашиглалтад орно. Мөн Чингэлтэй дүүргийн долоодугаар хороонд 150 ортой, Хан-Уулын 10 дугаар хороонд 150 ортой хүүхдийн цэцэрлэг шинээр нээгдэнэ. Үүнээс гадна Буянт-Ухаа-I хорооллын 120 ортой хүүхдийн цэцэрлэгийг улс худалдан авч байгаа. Бас Баянгол дүүргийн 57 дугаар цэцэрлэгийг буулгаж, 240 хүүхдийн ортой болгон шинэчилж, ашиглалтад оруулж байна.
В.Бат
Уншиж байна |