Үндэсний статистикийн хорооноос өнөөдөр Монгол Улсын нийгэм, эдийн засгийн байдлаар мэдээлэл хийсэн.

Үүнээс харахад манай улсын мөнгөний нийлүүлэлт 2015 оны 7 дугаар сарын эцэст 9.9 их наяд төгрөг болж өмнөх сарынхаас 177.9 тэрбум төгрөг буюу 1.8 хувь, өмнөх оны мөн үеийнхээс 214.8 тэрбум төгрөг буюу 2.1 хувиар буурчээ.

Харин гүйлгээнд гаргасан бэлэн мөнгө 2015 оны 7 дугаар сарын эцэст 759 тэрбум төгрөг болж, өмнөх сарынхаас 3.2 тэрбум төгрөг буюу 0.4 хувиар өсч, өмнөх оны мөн үеийнхээс 100.6 тэрбум төгрөг буюу 11.7 хувиар буурчээ.

Аж ахуй нэгж, байгууллага, иргэдэд олгосон нийт зээлийн өрийн үлдэгдэл 2015 оны 7 дугаар сарын эцэст 12 их наяд төгрөг болж, өмнөх сарынхаас 45.2 тэрбум төгрөг 0.4 хувь өсч, өмнөх оны мөн үеийнхээс 232.6 тэрбум төгрөг буюу 1.9 хувиар буурчээ. Хугацаа хэтэрсэн зээлийн өрийн үлдэгдэл энэ оны долоодугаар сарын төгсгөлд 716.4 тэрбум төгрөг буюу 18.6 хувь, өмнөх сарынхаас 112.6 тэрбум төгрөг буюу 18.6 хувь, өмнөх оны мөн үеийнхээс 166.3 тэрбум төгрөг буюу 30.2 хувиар өсчээ.

Банкны системийн хэмжээгээр чанаргүй зээл энэ сарын эцэст 824.6 тэрбум төгрөг болж, өмнөх сарынхаас 50.7 тэрбум төгрөг буюу 6.6 хувь, өмнөх оны мөн үеийнхээс 224.9 тэрбум төгрөг буюу 37.5 хувиар өссөн байна.