Сирийн Латакиа хотноо оросын мэргэжилтнүүд нисэх зурвас барьж эхэлсэн талаар Пентагоны хэвлэлийн төлөөлөгч Жефф Дэвис мэдэгдлээ. Тэрбээр “Латакиа хотноо байрлах “Hmaymeen” цэргийн нисэх буудлын ойролцоо нисэх зурвас барихаар 200 гаруй хүн ажиллаж байгаа” гэж хэлжээ.
Нисэх зурвас барих техник, төхөөрөмжийг Оросоос авчирсан бөгөөд өнгөрсөн ням гаригт Оросын мэргэжилтэн, зөвлөхүүд Латакиа хотноо иржээ. Мөн техник, төхөөрөмжөөс гадна 30 сая ам.долларын үнэ бүхий хүнсийг Сирид авчирсан байна. Дээрх асуудлаар АНУ-ын Төрийн нарийн бичгийн дарга Жон Керри, ОХУ-ын Гадаад хэргийн сайд Сергей Лавровтай ярилцахыг хүссэн ч татгалзсан хариу авсан тухай “www.dailymail.co.uk” мэдээллээ.
АНУ-ын Цагаан ордон “Орос тусламж, сайхан сэтгэл нэрийдлээр Сирид нисэх зурвас барьж, тун удахгүй Иракийн хэт даврагчидтай тулалдахаар төлөвлөж байна. Шинжээчдийн мэдээлснээр Оросын тусгайгийн 300 гаруй дайчин Латикиа хотноо байршиж, сири цэргүүдэд зөвлөгөө өгч эхэлсэн. Сирийн иргэний дайныг Орос улам даамжруулах хандлагатай байна” гэж мэдэгджээ.
2011 оны дөрөвдүгээр сард олон мянган сиричүүд Ерөнхийлөгч Башар аль Ассадын дэглэмийг эсэргүүцэж, огцрохыг шаардаж, эсэргүүцлийн жагсаал зохион байгуулсан билээ. Жагсаал даамжирч, иргэний дайн дэгдсэн юм. Иргэний дайны улмаас дөрвөн сая хүн эх орноосоо дүрвэж, 250 мянган хүн амиа алджээ. Дайны улмаас Ассадын нэр хүнд олон улсад унасан ч Орос, Сирийн гол холбоотон улс хэвээр байгаа юм. Өнгөрсөн сард Путин, Ассад нар хэт даврагчдын талаар утсаар ярилцсан талаар Сирийн төрийн мэдлийн “CANA” агентлаг мэдээлсэн билээ.
Б.Дэлгэрцэцэг
Уншиж байна |