ОХУ-ын талаас хил даван Увс аймгийн нутагт орж ирсэн хээрийн түймрийг унтраахаар хилийн цэргийн алба хаагчид болон нутгийн иргэд ажиллаж байна.

Увс аймгийн Зүүнговь сумын Тохой багийн “Тохойн хөвөө” /сумаас зүүн хойд зүгт 70 км-т/ гэдэг газар ОХУ-ын талаас хил даван 200 метрт хилийн 216-217 дугаар тэмдэгтээр хээрийн түймэр гарчээ. Уг түймрийг унтраахаар тус аймгийн Баруунтуруун сумын Хилийн цэргийн 0311 дугаар ангийн 3, 4 дүгээр заставын 43 албан хаагч, 2 автомашин, орон нутгийн 26 иргэн нийт 69 хүн 2 техник хэрэгсэлтэйгээр ажиллаж байна.

Мөн Энэ сарын 19-ний өдөр Увс аймгийн Сагил сумын Баянзүрх багийн “Хотлын дэнж” /сумаас 30 км/ гэдэг газар ойн түймэр гарчээ. Дуудлагын дагуу тус аймгийн Онцгой байдлын газрын 10 албан хаагч түймрийг унтраахаар ажиллаж байна гэж Онцгой байдлын ерөнхий газраас мэдээллээ.

Б.Хүлэг