АСЕМ-ын Дээд түвшний 11 дэх уулзалт  2016 оны 7 дугаар сард Улаанбаатар хотод болно. Үүнтэй холбогдуулан уулзалтыг зохион байгуулах үндэсний хороо болон ажлын хэсгүүд байгуулагдан бэлтгэл ажлыг хангаж байна.

Өнөөдөр Гадаад хэргийн яам, Хуульзүйн яам, нийслэлийн удирдлагаас бүрдсэн ажлын хэсгүүд “АСЕМ Вилла” хотхоноос “Шангри-Ла” зочид буудал хүртэлх маршрутын дагуу явж, үзлэг хийлээ. Тэд тус маршрутын дагуу хийгдэх хот тохижилт, замын бүтээн байгуулалтын ажил болон аюулгүй байдлыг хэрхэн хангах талаар авч хэрэгжүүлэх ажлаа тодорхойлж буй юм.

ГХЯ-ны Төрийн нарийн бичгийн дарга Д.Ганхуяг: АСЕМ-ийн хурлыг зохион байгуулах үндэсний хороо хуралдаж, хөтөлбөр баталсан. Хурлыг хаана зохион байгуулах, зочдыг хэрхэн байрлуулах ерөнхий чиглэл гарсны дагуу ажлын хэсгүүд хот тохижилт, замын бүтээн байгуулалтын ажилд үзлэг хийж байна.  АСЕМ-ын хуралд оролцох гадны зочид, төлөөлөгчид ямар замаар зорчих, аюулгүй байдлыг хэрхэн хангах талаар нарийвчилсан судалгаа хийж, ажиллана. Бид үзлэгийн дараа Гадаад хэргийн яаманд уулзалт хийж, нэн тэргүүнд юу хийхээ ярилцаж, тохирно.

Нийслэлийн Засаг даргын орлогч Н.Гантөмөр: Эхний ээлжид зочид зорчих замыг явж үзлээ. Гадаад хэргийн яам, Хуульзүйн яам, нийслэлийн түвшинд ярилцаад Засгийн газрын хуралдаанд яаралтай оруулах хэд хэдэн асуудал байна. Тухайлбал замын трасс, бүтээн байгуулалтын ажлыг шийдэх хэрэгтэй. Энэ жил далан, сувгийн газар шорооны ажлыг хийнэ. Ирэх хавраас асфальт бетоны ажлаа эхлүүлнэ. Маршилын гүүрнээс уруудаж буй хэсгийн замыг зайлшгүй шинэчлэх шаардлагатай байна.

Хуульзүйн яамны газрын дарга Ганбаатар: 2015 оны 5 дугаар сараас хамгаалалтын чиглэлээр төлөвлөгөө гаргаад ажиллаж байна. 53 орны төрийн тэргүүн, өндөр дээд хэмжээний зочид ирэхтэй холбогдуулан бид нийслэлийн удирдлагууд болон Гадаад хэргийн яамны холбогдох хүмүүстэй ярилцаж байна. Хамгийн яаралтай шийдэх асуудал нь цагдаа, тагнуул, төрийн тусгай хамгаалалтаас бүрдсэн шуурхай штабуудыг байгуулах шаардлагатай байна.

АСЕМ-ын Дээд түвшний 11 дэх уулзалтад гадны 3500-4000 гаруй зочин төлөөлөгч ирнэ гэсэн тооцоо бий. Тэднээс 53 орны төрийн тэргүүн, хоёр олон улсын байгууллагын удирдлага нийтдээ 55 хүнийг АСЕМ Вилла хотхонд байрлуулахаар төлөвлөөд байна.

В.Бат