Оросын байлдааны онгоцууд Ойрхи Дорнодод хяналтаа тогтоохыг санаархаж буй Иракийн хэт даврагч “Халифын вант улс” бүлэглэлд агаараас цохилт өгч эхэллээ. Энэ талаар Британийн “www.dailymail.co.uk” мэдээлэв.
Оросын байлдааны онгоцууд өчигдрөөс эхлэн хэт даврагчдад агаараас цохилт өгч эхэллээ. Ганцхан өдрийн дотор Оросууд хэт даврагчдын гол гол хуаранг устгасан болохыг тус улсын Батлан хамгаалахын сайд Сергей Шойгу мэдэгдлээ. Тэрбээр “Сирийг хэт даврагчдаас чөлөөлөхийн тулд бүхий л бололцоогоо ашиглах болно” гэж хэлжээ. Алан хядах “ИСИС” бүлэглэл Сири, Иракийн ихэнх нутагт хяналтаа тогтоож, “Халифын улс” байгуулан, барьцаанд байсан барууны иргэдийг цаазалж, хэдхэн өдрийн дотор олон зуун дайсантай болсон. Тус бүлэглэлийн эсрэг дэлхийн хамгийн хүчирхэг гүрнүүд болох АНУ, Их Британи, Герман болон Франц улс нэгдэж, агаараас цохилт өгсөөр байна.
Харин дээрх холбоотон орнуудад Орос нэгдээгүй бөгөөд хэт даврагчдын эсрэг хэзээ нэгдэх нь тодорхойгүй байсан юм. Орос дайтаж, ялалт байгуулж үзсэн улс. Хүйтэн дайны үеэр фашистуудыг ялж, нэг үгээр дэлхийг чөлөөлсөн. Холбоотон орнууд хэт даврагчдад цохилт өгсөөр байгаа боловч, тодорхой үр дүн харагдахгүй хагас жилийн нүүрийг үзэв.
Сарын өмнө ОХУ-ын Ерөнхийлөгч В.Путин “Бид хэт даврагчдад цохилт өгөхгүй” хэмээн мэдэгдсэн ч тэрбээр энэхүү мэдэгдлээ саяхан өөрчилж “Ассадын эрх мэдлийг хамгаалахын тулд Орос хэт даврагчдын эсрэг нэгдлээ. Гэхдээ Орос холбоотон орнуудад нэгдэхгүй бие дааж цохилт өгөх болно” гэж хэлжээ. Өнгөрсөн сард Москва хотноо Ойрхи Дорнодын удирдлагууд чуулж, Сирийн хямралын асуудлаар ярилцсан. Энэхүү хуралдаан хаалттай болсон бөгөөд хуралдааны дараа Путиний бодол өөрчлөгдсөн.
Удирдагчид юуны талаар ярилцав. Тэд АНУ-аас илүү Орост итгэсэн гол шалтгаан өнөөдрийг хүртэл нууц хэвээр байна. Мөн энэ долоо хоногийн эхээр Нью Йорк хотноо Обама, Путин нар уулзсан. Удирдагчид 90 минут Сири, Украины асуудлаар ярилцсан бөгөөд ойрын эх сурвалжийн мэдээлснээр тэд “Ассадаас болж муудалцсан” гэв. Энэхүү уулзалт үр дүнтэй мэт харагдавч үнэн хэрэгтээ “үр дүнгүй” уулзалт болсон. Тэд Сири, Украины хямралыг цэгцлэх, дуусгах талаар ярилцсан ч хямралаас гарах төлөвлөгөөг боловсруулж чадаагүй. Путин уулзалтын дараа хэт даврагчдын эсрэг эргэлт буцалтгүй нэгдэж буйгаа мэдэгдэж, Батлан хамгаалах яамаа хэт даврагчдад цохилт өгөхийг үүрэгдэв.
Путин ийнхүү мэдэгдэхээс өмнө “Оросын байлдааны онгоцууд хэдийнэ гараанаас гарч, Сирийг чиглэн явж байсан” хэмээн барууны хэвлэлүүд мэдээлж байна. Путин үнэхээр хэт даврагчдын эсрэг нэгдсэн үү эсвэл Ассадын эрх мэдлийг хамгаалахын тулд байлдааны онгоцуудаа Сири улс руу явуулсан уу. Путин хэлсэн ёсоороо Сирид цохилт өглөө. Оросын байлдааны онгоцууд Сирийн Хама хот болон түүний зэргэлдээ хотуудад цохилт өгч байна. Оросын удирдлагуудын мэдээлснээр “Ганцхан өдрийн дотор хэт даврагчдын гол хуаранг устгасан” хэмээн мэдээллээ. Мөн Кафр Залида мужид агаараас цохилт өгч, хэт даврагчдыг бүсэлсэн хэмээв.
Харин АНУ-ын Цагаан ордны удирдлагуудын мэдээлснээр “Оросын байлдааны онгоцууд цохилт өгч буй газруудад хэт даврагчид бус Ассадын дэглэмийг унагаахад голлох үүргийг гүйцэгтэж буй сөрөг хүчнийхний хяналтад байдаг бүс нутгууд” хэмээн буруутгажээ. АНУ-ын Төрийн нарийн бичгийн дарга Жон Керри “Миний бодлоор Оросууд хэт даврагчдад цохилт өгөхгүйгээр Ассадын гол дайснуудыг ангуучилж байна” гэж хэлжээ.
Энэхүү мэдэгдлийг ОХУ-ын Гадаад хэргийн сайд Сергей Лавров үгүйсгэж “АНУ хий хоосон мэдээлэл нийгэмд тараахаа зогсоо” хэмээн хатуухан мэдэгдэв.
АНУ-ын Ерөнхийлөгч Барак Обама “Оросууд Ассадын дэглэмийг авч үлдэхийн тулд энгийн иргэд рүү дайрч, устгаж байна” гэв.
Энэхүү мэдээллээ батлахыг ОХУ-ын Батлан хамгаалахын сайд Сергей Шойгу шаарджээ.
Цагаан ордны хэвлэлийн төлөөлөгч Жош Карней “Оросын агаарын цохилтын үеэр 30 хүн амиа алдсан. Амиа алдагсдын таван нь бага насны хүүхэд. Оросуудаас болж энгийн иргэд хохирч байна” гэж хэлжээ.
Дээрх мэдээллийг Крымль эрс үгүйсгэжээ. Учир нь “AFP” агентлагт нийтлэгдсэн хүүгээ тэврээд гуйж буй эмэгтэйн зургийг Оросын агаарын дайралтын үеэр бус өнгөрсөн сарын 25-нд авсан болохыг Оросын удирдлагууд мэдээлэв.
Пентагоны тэргүүн Эштон Картер энгийн иргэдийг хохироохгүй байхыг оросуудад сануулж, цэргийн зөвлөхүүдээ Москва руу илгээсэн юм. Зөвлөхүүд өчигдөр зорьсон газраа хүрч Оросын Батлан хамгаалахын удирдлагуудтай уулзсан талаар Картер мэдэгдлээ.
Хоёр улсын цэргийн зөвлөхүүд агаарын цохилтын асуудлаар ярилцжээ. Уулзалт 74 минут үргэлжилсэн байна. Энэхүү уулзалт хэдэн өдөр ч үргэлжлэх боломжтой гэдгийг Пентагоныг төлөөлөн Москвад ирсэн Элисса Споткин мэдэгдэв. Тэрбээр “Бид энэ уулзалтаар үнэнийг тогтоох болно. Орос “ИСИС” бүлэглэлээс гадна Сирид хяналтаа тогтоохыг санаархаж буй “Жабхат аль Нусра” бүлэглэлийн эсрэг нэгдэж, агаараас цохилт өгч байна” гэсэн байна.
Энэхүү мэдээллийг Сергей Лавров баталж “Сирийг хэт даврагч, террорист бүлэглэлүүдээс чөлөөлөх нь энэхүү ажиллагааны чухал хэсэг” гэжээ.
Б.Дэлгэрцэцэг