Холливуудын нэрт жүжигчин Вин Дизель өчигдөр “ABC” телевизийн “Оддын цаг” шоунд оролцож, ярилцлага өгчээ. Тэрбээр сүүлд “Галзуу хурд” болон “The Last Witch Hunter” буюу “Шуламын сүүлчийн ангууч” кинонд тоглосон юм. Тус уран бүтээл ирэх сард нээлтээ хийнэ.

-Бурхан минь та XXX размертэй болчихсон байна. Их таргалсан байна шүү?

-Гэхдээ өмнөх шиг эрч хүчтэй хэвээрээ байгаа. /Дуучин Жастин Биберийн “Baby” дууг дуулав/.

-Жин нэмсэнд ямар нэгэн шалтгаан байна уу?

-Байхгүй зүгээр л ходоодоо хорихыг хүсээгүй. Хүссэн бүхнээ идэж, илүүдэл жин зэргээс айхаас залхсан юм. Байнга дасгал сургуулилт хийхээр их тамирдаж байна. Гэхдээ би булчинлаг байхдаа илүү догь харагддаг гэдгээ мэддэг. Хүүхнүүд ч миний гэдэсний булчинд дуртай. Тиймээс турах болно.

-Бүсгүйчүүдийн төлөө турна гэж үү?

-Үгүй дээ. Өөрийнхөө төлөө. Энэ үг хүмүүст утгагүй санагдах байх. Гэхдээ би өөртөө хайртай. Толины урдуур явах бүртээ “Хөөх энэ гайхалтай залуу чинь хэн билээ” гэж боддог. Өөрийгөө магтахыг хүсэхгүй байгаа ч гадаад төрхөөрөө дүр авч байсан тохиолдол надад бий.

-Та өөрийгөө дэлгэцэн дотор гайхалтай харагддаг гэж боддог. Гэхдээ та холливуудын хамгийн сайн залуу шалгаруулалтад тийм ч дээр бичигддэггүй. Энэ тухай?

-Би тоглосон кино, зар сурталчилгаагаа үзэх дуртай. Жүжигчид өөрийнхөө тоглосон бүтээлээ үзэх дургүй гэхэд миний инээд хүрдэг. Хэзээ ч тийм үгэнд итгэж болохгүй. Дахин алдаа гаргахаас эмээж өөрийнхөө тоглосон уран бүтээлүүдээ байнга үзэж, дүгнэлт хийх дуртай. Бусад уран бүтээлч шиг олон бүтээлд дүрээ мөнхлөөгүй ч өөрийнхөө тоглосон цөөхөн бүтээлээ байнга үзэж, өөрийгөө хурцалдаг. Би тоглосон киногоороо бахархдаг. Миний бахархалын эхэнд тэд орно. Дахиад л өөрийгөө магтах гэх гээд байна. Тиймээ. Би өөрийгөө гайхалтай харагддаг гэж боддог. Шалгаруулалт энэ тэр надад хамаагүй. Би өөртөө сэтгэл хангалуун байвал бусад нь надад хамаагүй. Надад л таалагдаж байвал би гудамжаар нүцгэн ч явж чадна.

-Таны урлагийн карьер 2000 оноос эхэлсэн гэхэд болно. Халзан толгойтой булчинлаг залуу “Pitch Black” кинонд тоглосноороо хормын төдийд алдаршсан. Гэхдээ энэ төрхтэйгээ их олон жил боллоо. Сүүлд тоглосон “Сүүлчийн шулам Хэнтер” кинонд гадаад төрхөө эрс өөрчилж, үстэй болсон байсан?

-Тиймээ. Адал явдалт кино. Их ур чадвар шаардсан бүтээл болсон. Хоёр үеийг харуулах учир би бага зэрэг гадаад төрхөндөө анхаарал хандуулах шаардлагатай болсон.

-Үстэй болох ямар байв?

-Би үсээ ургуулаагүй, зүгээр хиймэл үс зүүсэн. Зураг авалтын турш толгой загтнаж, надад хэцүү байсан.

-“Галзуу хурд 7” амжилт олж, түүхэндээ анх удаагаа тэрбум доллар олсон. Таны нэг яриаг уншиж байхад Пол Уолкерийн хэсэгт өөр хүн тоглож байхад сэтгэл өвдөж, дүрдээ орж чадахгүй байсан гэсэн?

-Тиймээ. Миний анд. Цаг хугацаа гэж аргагүй л хурдан юм. Нэг л мэдэхэд Пол бидний дэргэдээс яваад хоёр жил болжээ. Зураг авалтын үеэр бид нэг хэсгээ алдсан. Киногоо товлосон цагтаа үзэгчдэд хүргэхийг хүссэн учир аргагүй эрхэнд орлон тоглогч хөлсөлсөн. Полын дүү ахаасаа дутахааргүй үүргээ сайн гүйцэтгэсэн.

-Та охиндоо Полын нэрийг өгсөн. Та хоёрын үерхэл үнэхээр агуу гэдгийг энэхүү үйл явдлаас олон нийт харсан?

-Тиймээ, найзыгаа мартахгүйн тулд охиндоо нэрийг нь өгсөн. Анд минь чамайг мартаагүй. Учир нь охиноо харах бүртээ би чамайг дурсдаг.

-Твиттер, инстаграм зэргийг хэр ашигладаг вэ?

-Боломжоороо ашиглахыг хүсдэг. Гэхдээ компьютерийн ард өдөржингөө сууж, интернэтээр цэцэрхэх нь утгагүй хэрэг. 

-Эмэгтэйчүүд таргалахаас бас хөгшрөхөөс айдаг. Хэдийнэ бидний хайртай Дизель 48 нас хүрчээ. Хэдхэн алхмын дараа 50 нас хүрнэ?

-Залуу насаа зугаатай бас завгүй өнгөрүүлсэн учир тийм ч их харамсахгүй байна. Манай эхнэр жирэмсэн байхдаа л “яаж турна аа” гэдэг байсан. Би тэр үгийг сонсоод “Энэ бүсгүйчүүд бага зэргийн сэтгэцийн өвчтэй байхаа” гэж боддог байсан. Бүсгүйчүүд хулгайчаас бус илүүдэл жингээс айдаг байх. /Инээв/

Б.Дэлгэрцэцэг