УИХ-ын гишүүн Ц.Нямдорж, Г.Уянга нар одоо 15.00 цагт Төрийн ордны "Г" танхимд шуурхай хэвлэлийн хурал зарлалаа. Хурлаар юу ярих нь тодорхойгүй ч Ерөнхий сайд Ч.Сайханбилэгийг огцруулах асуудлыг хөндөж болзошгүй гэсэн таамаг байна. “УИХ-ын нэг гишүүн Засгийн газрын гишүүнийг огцруулах санал гаргах нь Үндсэн хууль зөрчиж байна” гэсэн Цэцийн дүгнэлт гишүүдийн дунд маргаан үүсгэж, бүр ажлын хэсэг байгуулагдах хэмжээнд хүрсэн. Энэ асуудлыг судлах ажлын хэсгийг УИХ-ын гишүүн Ц.Нямдорж ахалж, Д.Ганбат, Г.Уянга нар бүрэлдэхүүнд нь ажиллаж байгаа. Дөнгөж УИХ-ын нэгдсэн чуулганаар энэ асуудлыг хэлэлцэж, Ц.Нямдорж Засгийн газарт Үндсэн хуулийн цэцэд нөлөөлж, хууль бус үйл ажиллагаа явуулсан учраас холбогдох хүмүүст хариуцлага тооцох ёстой хэмээн үзэж буйгаа танилцуулсан юм. Хэвлэлийн хурлын үеэр энэ асуудлыг хөндөнө байх.
УИХ-ын гишүүн Г.Уянга Ерөнхий сайд Ч.Сайханбилэгийг огцруулахаар гишүүдийн гарын үсгийг цуглуулж буй. Өчигдөр тус бичигт УИХ-ын гишүүн О.Содбилэг, Д.Хаянхярваа нар гарын үсэг зурсан. Тэгвэл өнөөдөр УИХ-ын гишүүн Ц.Нямдорж гарын үсэг зурж, Ерөнхий сайдыг огцруулах эгнээнд нэгджээ.