АСЕМ-ын Дээд түвшний 11 дэх уулзалт ирэх оны долоодугаар сарын 15, 16-нд Улаанбаатар хотод болно. Энэхүү уулзалтад дэлхийн өндөр хөгжилтэй орнуудын төрийн тэргүүн болон өндөр албан тушаалтнууд, албаныхан нийлсэн 5 000 орчим зочид төлөөлөгч ирнэ гэсэн урьдчилсан тооцоог хийгээд буй. АСЕМ-ын Дээд түвшний уулзалтыг бага зардлаар оновчтой зохион байгуулах бодлогыг барьж буйгаа Гадаад хэргийн сайд Л.Пүрэвсүрэн хэлж байна. Түүнээс АСЕМ-ын хурлын бэлтгэл ажлын талаар зарим зүйлийг тодрууллаа.

АСЕМ-ын зочдод зориулж олон тооны машин худалдан авч байгаа гэсэн мэдээллийг өмнө нь үгүйсгэж байсан. Үүнд тайлбар өгөөч. Гаднаас машин худалдаж авах уу?

-Хэвлэлээр гарсан шиг тийм олон машин оруулж ирээгүй. Төрийн шугамаар цөөн машин захиална. Гадны төрийн тэргүүнүүд аюулгүй байдлын шаардлага тавьдаг. Японы Ерөнхий сайд, Германы Канцлер хуягласан машин шаарддаг. Энэ үүднээс бид төрийн үйлчилгээнд зориулж хуягласан машин захиалахаар ярьж байгаа. Гэхдээ хөрөнгөний асуудал шийдэгдээгүйгээс захиалгаа гүйцэд хийгдээгүй байна.

Машин авах хөрөнгө нь шийдэгдээгүй гэсэн үг үү?

Төсвийн хүндрэлээс болоод мөнгө нь шийдэгдэхгүйгээс захиалгаа баталгаажуулж чадаагүй байна. Бид АСЕМ-ын хурлыг бага зардлаар оновчтой зохион байгуулах бодлогыг барьж байгаа. Ингэхдээ хувийн хэвшил, сайн дурынхныг оролцуулна. Тухайлбал хувийн компаниудын оруулж ирэх машинуудыг гаалийн татвараас чөлөөлнө. Тэгээд хурлын үеэр машиныг нь авч түр ашиглах тухай ярьж байгаа.

АСЕМ-ын хурлыг зохион байгуулахад гадны орнуудаас тусламж авч байгаа гэсэн. Ямар орнуудаас тусламж авах вэ?

Улс орнууд бэлэн мөнгө бус материаллаг байдлаар тусламж үзүүлж байгаа. Хятад буцалтгүй тусламж үзүүлж байгаа. Бас Герман, Европын холбоо, Японы зүгээс мэргэжилтэн ажиллуулж, тусламж үзүүлж буй. Тухайлбал Германын зөвлөгч ёслолын асуудлаар зөвлөгөө, мэдээлэл өгч, ирж, очин ажиллаж байгаа. Европын холбооноос орчуулагч нарыг бэлтгэхэд дэмжлэг үзүүлэхээ илэрхийлсэн. Гадаад хэргийн яамны сонгон шалгаруулсан 6-7 орчуулагчийг урт хугацааны мэргэжлийн сургалтад хамруулахад Европын холбоо тусална.

АСЕМ-ын Вилла хотхоны ажлын явц ямар байгаа вэ?

Ерөнхийлөгчийн Тамгын газрын дарга П.Цагаанаар ахлуулсан ажлын хэсэг зочдыг хүлээж авах, ёслол хүндэтгэлийн арга хэмжээг хариуцан ажиллаж байгаа. Төрөөс санхүүжилт гаргаж, 40 гаруй зочид буудалд засвар үйлчилгээ хийж, хүмүүсийг нь сургаж байгаа. Зочдоо байрлуулах бол том асуудал. Ойролцоогоор 5000 хүн ирнэ.Бид аялал жуулчлалын яам, аялалын холбоодтой хурал болох үеэр зочид буудлуудыг сул байлгах зохицуулалтыг хийх талаар ярьж байна. АСЕМ Вилла хотхоны хувьд 2016 оны тав, зургаадугаар сард бэлэн болох ёстой.

Энэ жил АСЕМ-д зориулж хэдэн төгрөг төсөвлөсөн вэ? Юунд зарцуулж байгаа талаар мэдээлэл өгөөч.

Энэ жил АСЕМ-д зориулж таван тэрбум төгрөг төлөвлөсөн. 20 гаруй хүний бүрэлдэхүүнтэй АСЕМ-ын  ажлын алба ажиллаж байгаа. Тэр хүмүүсийг цалинжуулах, байрны түрээс төлөх, орчуулагч нарыг бэлтгэхэд зарцуулж байна. Мөн энэ мөнгөнөөс хуягласан машинуудын урьдчилгааг хийж, захиалгаа баталгаажуулах ёстой. Гэвч төсвийн байдлаас болоод захиалгаа хийж чадаагүй байна.

В.Бат