НИТХ дахь МАН-ын бүлгээс нийслэлийн Засаг дарга бөгөөд Улаанбаатар хотын захирагч Э.Бат-Үүлийг огцруулах санал гаргасан билээ. Тус бүлгээс хотын даргыг төсвийн мөнгийг үр ашиггүй зарцуулсан, ашиг сонирхлын зөрчил гаргасан хэмээн буруутгаж, огцруулах албан бичгийг НИТХ-ын дарга Д.Баттулгад өргөн мэдүүлсэн юм. Харин НИТХ-ын дарга Д.Баттулга хотын мээр Э.Бат-Үүлийг огцруулах МАН-ын бүлгийн саналыг хуралдаанаар хэлэлцэхгүй хэмээн мэдэгдсэн. Учир нь хурлын төлөөлөгчдийн 1/3-ээс доошгүй нь Засаг даргыг огцруулах саналд гарын үсэг зурсан тохиолдолд хуралдаанаар хэлэлцэнэ гэсэн хуулийн шаардлагыг МАН-ын бүлгийн санал хангаагүй юм.

Тэгвэл МАН-ын бүлэг хотын даргатай хариуцлага тооцох ээлжит бичгээ Ерөнхий сайд Ч.Сайханбилэгт хаяглажээ. Энэ удаа хотын дарга Э.Бат-Үүлийн зургаан орлогчийн асуудал хууль зөрчиж буй учраас хариуцлага тооцох ёстой хэмээн үзсэн байна. Ингэхдээ Э.Бат-Үүлийн зургаан орлогчийг хоёр болгон цөөлөх чиглэлийг өгөхийг хүсчээ. Мөн хууль тогтоомж зөрчиж, орлогч нараа авч үлдсэн хотын дарга ч хариуцлагын гадна үлдэх ёсгүйг албан бичигт дурджээ.

В.Бат