АТГ-аас ЭМС-ын сайд, МАХН-ын Ерөнхий нарийн бичгийн дарга Г.Шийлэгдамба нарын хэсэг хүмүүсийг өчигдөр шөнө баривчлан хорьсон байна. Үүнтэй холбогдуулан тус намын нарийн бичгийн дарга Ц.Шаравдорж, Э.Эрдэнэжамъян нар мэдээлэл хийлээ. МАХН-ын нарийн бичгийн дарга Э.Эрдэнэжамъян:
-АТГ-аас ЭМС-ын сайд, МАХН-ын Ерөнхий нарийн бичгийн дарга Г.Шийлэгдамбыг баривчилсан нь манай намын удирдлагуудын эсрэг хийж байгаа хэлмэгдүүлэлтийн үргэлжлэл. Энэ бол цэвэр улс төрийн зорилготой, захиалгат үйл ажиллагаа. МАХН шударга үнэний төлөө тэмцсээр ирсэн. Бид энэ хэлмэгдүүлэлтээс айхгүй. МАХН улс орны хөгжлийн төлөө, ард түмнийхээ төлөө зүтгэсээр байх болно гэсэн бол МАХН-ын нарийн бичгийн дарга Ц.Шаравдорж:
-Манайх өөрийн байр суурь, бодлоготой нам. Бидний үйл ажиллагааг зогсоох гэж оролдож байна. Бид олон шахалтыг давсан. Цаашдаа ч Монгол улсынхаа хөгжлийн төлөө зүтгэнэ. Нийтийг хамарсан мөрдлөг, тагнах чагнах ажиллагаа ердийн үзэгдэл болжээ. Монголчуудынхаа төлөө гэсэн хүмүүсийг хэлмэгдүүлж байна. Шүүх, прокурор, АТГ хэлмэгдүүлэлтийн газар болсон нь бүүр ч гутамшигтай. Монголчууд айдас дунд амьдарч байна. МАХН-ын дарга Н.Энхбаяр “Оюутолгой”, “Тавантолгой”-г ард түмэндээ өгөх ёстой гэж хэлээд хэлмэгдсэн. Бид Үндсэн хуулиндаа хүний эрх, эрх чөлөөг тунхагласан ардчилсан улс гэсэн юм. Тэд мэдээлэл хийснийхээ дараа сэтгүүлчдийн сонирхсон асуултад хариуллаа.
-Та бүхэн МАХН-ын Ерөнхий нарийн бичгийн дарга Г.Шийлэгдамбыг баривчилсаныг хэзээ мэдсэн бэ?
МАХН-ын нарийн бичгийн дарга Э.Эрдэнэжамъян:
-АТГ-ынхан ямар ч өмгөөлөгчгүйгээр тэр хүмүүсийг дарамталж мэдүүлэг авчээ. Г.Шийлэгдамба сайдыг ямар нэг гэмт хэрэг үйлдсэн гэж итгэхгүй байна. Ажлаа хийж байгаад хэлмэгдчихлээ.
-З.Баянсэлэнгэ нарын гишүүнийг хайж байна гэсэн?
-З.Баянсэлэнгэ сайд ажлаа хийж байгаа. Г.Шийлэгдамба сайдыг баривчиллаа гэсэн сургаар Шадар сайд Ц.Оюунбаатар, БХБ-ын сайд З.Баянсэлэнгэ нарын хамт АТГ-аас асуусан. Гэтэл АТГ-ынхан баривчлаагүй эвсэл Цагдан хорих 461-р ангид хорьсон гээд байсан. Гэтэл шөнийн 00-04 цаг хүртэл АТГ-ынхан мэдүүлэг авсан байна. Г.Шийлэгдамба сайдыг ажлын бус цагаар 4-5 хүний хамт баривчилжээ. Хамт баривчилсан хүмүүсийг нь суллаад гадуур байцаалт өгүүлэхээр болсон байна.
-Авлига авч байгаад үйлдэл дээрээ баригдсан гэсэн мэдээлэл байна?
-Энэ бол АТГ-ын ээлжит зохиомжит жүжиг. Ажлын өрөөндөө авлига авч байхад нь АТГ-ын 30-40 ажилтан орж баривчиллаа гэж зохиол тавиад байна. Г.Шийлэгдамбадаа бид итгэж байгаа.
-Өмгөөлөгч авсан уу?
-Бид одоо өмгөөлөгч хөөцөлдөж байна. Гэхдээ АТГ-ын эсрэг өмгөөлөх өмгөөлөгч олдохгүй байна. Өмгөөлөгч хайж байгаа.
МАХН-ын нарийн бичгийн дарга Ц.Шаравдорж:
-МАХН-аас албан тушаал хашиж байгаа хүмүүсийг өдөр бүр нэг нэгээр нь шалгаж байна. АТГ-ын энэ арга хэмжээг зохион байгуулалттай хийлээ. Нэг талаас эрх барьж байгаа хүчний фракц, бүлэглэлээс хүмүүс шалгагдаж байгаа. Олны анхаарлын төвийг тэднээс холдуулах гэсэн байх магадлалтай. Нөгөө талаас МАХН өчигдөр ахмадуудтайгаа уулзалт хийж, зөвлөгөөг нь сонссон. Энэ нь зарим улс төрийн хүчинд таалагдаагүй байж болно. Тиймээс захиалгаар удирдлагуудыг нь баривчилж байна.
Н.Энх