УИХ-ын чуулганы нэгдсэн хуралдаанаар Хамтын тэтгэврийн тухай хуулийн төслийн эцсийн хэлэлцүүлгийг хийж байна. Хэлэлцэж байгаа асуудалтай холбогдуулан гишүүд асуултад ХАХНХ-ын сайд С.Эрдэнэ хариулав.
УИХ-ын гишүүн Ж.Батзандан:
-Хуулийн төсөлд анх гэр бүл болоод 10 жил болсон гэдгийг 15 жил болгожээ. Гэр бүлийн хоёр 20 жил нийгмийн даатгалын шимтгэл төлсөн гэж төсөлд тусгасныг тайлбарлахгүй юу?
-Хуулийн эргэж буцаж үйлчлэх хугацааг тоон үзүүлэлтээр заагаагүй. Хамрах хүрээг Засгийн газар тухайн жилийнхээ төсөв санхүүд тулгуурлаж олгоно гэж заасан.
УИХ-ын гишүүн Ё.Отгонбаяр:
-Энэ хуулийг 2017 оны нэгдүгээр сарын нэгнээс гэж заажээ. Дараагийн парламент, Засгийн газрын үед хэрэгжих юм байна. 2016 оны нэгдүгээр сарын нэгнээс хамруулбал ямар вэ?
-Энэ хуулийг хэлэлцэх үед 2016 оны улсын төсөв батлагдсан байсан. Тийм учраас 2017 онд хэрэгжүүлэхээр заасан. Гэхдээ хууль хэрэгжих үед хамрах хүрээг заагаагүй учир зохицуулалт хийгдэх байх. Энэ бол гэр бүлийн үнэ цэнийг нэмэгдүүлж байгаа зүйл. Тухайн гэр бүлийн өөрсдийнх нь бүтээсэн баялаг. Түүнээс бус тэтгэвэр нэмэгдэж байгаа гэсэн үг биш.
УИХ-ын гишүүн Ж.Энхбаяр:
-Цэргийн албан хаагчид үндсэндээ 45 настай тэтгэвэрт гардаг. Гэтэл эмэгтэй 55, эрэгтэй 60 наснаас тэтгэвэр авна гэж байна. Энэ хуульд цэргийн албан хаагчдын гэр бүл хамрагдаж чадахгүй болох нь. МАН-ын бүлэг малчдын тэтгэврийн асуудлыг оруулж ирсэн. Үүнд улстөржих шаардлага байхгүй. Монгол Улсын иргэн бол Монгол Улсын л иргэн. Гэтэл иргэдээ 15 жил амьдарсан, амьдраагүй гэр бүл гэж ялгаж салгаж гадуурхаж болохгүй. Тэтгэврийн шинэчлэлтэй холбоотой асуудлыг нэг мөр шийдвэрлэх хэрэгтэй.
-Цэргийн албан хаагчийн тэтгэврийг тусгай хуулиар зохицуулдаг. Бүрэн тэтгэвэр тогтоолгосон цэргийн албан хаагчид энэ хууль үйлчилнэ. Тусгай зохицуулалтаараа явна. Харин түүний гэр бүлд ьн энгийн иргэдийн адил, ялгаа гаргахгүйгээр хуульчилсан. Гэр бүл болоод 15 жил болсон гэдэг нь Үндсэн хууль зөрчихгүй. Учир нь нийгмийн асуудлаас урган гарсан. Хамтын тэтгэврийн тухай хууль бол ахмад настны нийгмийн хамгааллын маш том бодлого болно.
УИХ-ын гишүүн Д.Арвин:
-Энэ хуулийн төслийг ирэх оны нэгдүгээр сараас хэрэгжүүлэх эрх мэдлийг Засгийн газарт өгөөч ээ гэсэн юм.
Ийнхүү үдээс өмнөх чуулганы хуралдаан завсарлалаа. Үдээс хойшхи хуралдаан Хамтын тэтгэврийн хуулийг батлах санал хураалтаар эхлэх юм.
Н.Энх
Уншиж байна |