УИХ-ын ээлжит сонгууль хагас жил гаруйн дараа болох гэж байна. Сонгуульд нэр дэвшихийг горилогчид нь эхнээсээ тодорч, сонгогчдын саналыг татах зорилгоор нүүрс, зуух, бидоноос эхлээд хувцас хүртэл тарааж буйг бид харж байгаа.

Учир нь Сонгуулийн тухай хууль гагцхүү тухайн сонгууль болох жилийн 1 сарын 1-нээс л хэрэгжиж эхэлдэг учиртай. Иймээс л УИХ-ын гишүүний суудал горилогчид хуулийн хязгаарлалт эхлэхээс өмнө амжуулж буй нь энэ. УИХ-ын сонгуульд нэр дэвшихийг горилогчдын нэрс ч эхнээсээ тодорхой болоод байна. УИХ-ын сонгуулийн 1-р тойрог буюу Архангай аймагт гэхэд л нэр дэвшихээр зэхэж буй улс төрчдийн тоо аль хэдийн 10 хол давсан гэх.

Үүнээс хамгийн ахмадууд нь УИХ-ын гишүүн, АН-ын Н.Батбаяр, УИХ-ын гишүүн, МАХН-ын Д.Тэрбишдагва нар аж. Аль аль нь төрийн өндөр албан тушаалыг төрөл бүрээр нь л хашиж үзсэн бөгөөд Н.Батбаяр гэхэд л аль 1990-1992 онд АИХ-ын дэд даргаар ажиллаж, хожим нь ЗГХЭГ-ийн дарга бөгөөд сайд, Барилга Хот байгуулалтын сайд, Эдийн Засгийн хөгжлийн сайд болж, УИХ-д 3 удаа сонгогдсон нэгэн. Харин Д.Тэрбишдагва Шадар сайдаар 1 ,Хөдөө Аж Ахуйн сайдаар 2 удаа ажиллаж, мөн л 3 удаа УИХ-д сонгогдсон аж. Ирэх сонгуульд дээрх хоёр эрхэм дахин хүчээ үзвэл Д.Тэрбишдагва 61-тэйдээ, Н.Батбаяр 63-тайдаа УИХ-ын сонгуульд өрсөлдөх юм.

Х.Ганбат