УИХ-ын чуулганы нэгдсэн хуралдаан үргэлжилж байна. Хуралдаанаар Ирээдүйн тэтгэврийн сангийн тухай хуулийн төслийг анхны хэлэлцүүлэг хийлээ. Энэ хуулийг анхны хэлэлцүүлгээр нь батлах тухай горимын санал мөн дэмжигдлээ. Ингэснээр орон сууцны ипотекийн зээлийн хүү 5 хувь бол буурах эрхзүйн орчин бүрдэж байгаа юм.
Үүний дараагаар Зарим газар нутгийн улсын тусгай хамгаалалтад авах тухай хуулийн төслийг хэлэлцээд эцсийн хэлэлцүүлэгт шилжүүллээ. Үүний дараагаар Гацууртын ордод төрийн хувь эзэмшлийг тогтоох тухай төслийн эцсийн хэлэлцүүлгийг хийж байна. Хэлэлцэж байгаа асуудалтай холбогдуулан гишүүн Г.Уянга Гацууртын ордыг ашиглах гэж байгааг эсэргүүцсэн юм. Түүний хариуд Ерөнхий сайд Ч.Сайханбилэг:
-Г.Уянга гишүүн ээ, одоо арай дэндлээ. Энэ улс яаж урагшлах, хөгжих вэ? Таныг үг хэлж, гүтгэж доромжлоход дуугүй сонсдог. Манай аав, С.Баярцогтын аав 80 настай. 40-тэй хүүхэн 80-тай хөгшид рүү захиа бичээд байх юм. Миний аав Улаанбаатар хотын СОТ-ын барилгуудыг ашиглалтад ороход хүлээж авсан хүн. Танаас илүү ажил бүтээсэн. Хөгшнөө алдаад гэртээ байдгаа хөгшнийг тайван орхи. Улс төр хийх гэж байгаа бол надтай ярь, Ерөнхий сайдтай ярь. Одоо болохоо байгаад гэр бүл рүү орж байна. С.Баярцогтын аав насаараа Сэлэнгэ аймагт тариа тариад, таны идэж байгаа гурилыг, бэлтгэдэг хүн.
Таны хайчин дунд ямар Засгийн газар хөгжих вэ? Наад “поп” чинь хэрээсээ хэтэрлээ, Г.Уянга аа. Таны хармаанд цуглуулах улс төрийн оноо бол хамгийн сүүлийн асуудал. Таны хэлж байгаа юм болгон алга ташуулах албагүй. Ноён уулаа хамгаалах шийдвэрийг гаргаж байна. Ноён уулын цаана байгаа Гацууртын ордыг эдийн засгийн эргэлтэд оруулах гэж байгаа. Та өөрөө популизмдаа хордчихсон байна гэв.
Гацууртын ордод төрийн хувь эзэмшлийг тогтоох тухай төслийг хэлэлцэх үед УИХ дахь МАН-ын бүлгийн гишүүд хуралдааны танхимыг орхин гарсан байлаа. Тиймээс АН-ын бүлгийн дарга Б.Гарамгайбаатар “Энэ асуудлаар АН 5 хоногийн завсарлага авч байна. Гацууртын ордыг батлах санал явуулахад МАН-ын бүлгийн гишүүд байхгүй байгаа тул эсрэг санал давамгайлна” гэлээ.
Чуулганы хуралдаан үргэлжилж байна.
Н.Энх