ОХУ-ын Ерөнхийлөгч В.Путиний нууц хөрөнгө, авлигын асуудал олон улсын анхаарлыг татаж байна. Энэ талаар  “ВВС” агентлаг баримтат кино бүтээсэн байна.

Их Британийн “ВВС” агентлаг ОХУ-ын Ерөнхийлөгч В.Путиний нууц хөрөнгийн талаар баримтат кино бүтээжээ. Уг баримтат киноны нэр нь “Путиний нууц баялаг” аж. Энэ долоо хоног Путин болон түүний гэр бүлтэй нь холбоотой дуулианууд ар араасаа гараад байна.  Путин 30 жил ханилсан эхнэрээ хадамд гаргасан, улсын мөнгийг хувьдаа завшсан, хөрөнгийн мэдүүлэгт дурьдаагүй газар, орон сууц гэх мэт асуудал олны анхаарлыг татсаар.

АНУ-ын Сангийн дэд сайдын орлогч Адам Шубан өчигдөр Путинийг авлигын хэрэгт буруутгаж улсын хөрөнгийг хувьдаа завшдаг хэмээсэн билээ. Тэрбээр “ВВС” агентлагт “Путин өөрийн найз, нөхөд, хамтран зүтгэгч, тойрон хүрээлэгчдээ санхүүжүүлж, баяжуулж байна. Орос улсад орж буй ихэнх мөнгийг тэрбээр өөрийн хувийн дансандаа шилжүүлж, үүргээ сайн гүйцэтгэсэн хүмүүсийг хахуулддаг. Харин өөрийнх нь  эсрэг нэгдсэн хүмүүсийг зайлуулдаг. Энэ бол жинхэнэ авлига” гэж ярьжээ.

Адамын уг ярианаас эш татан “ВВС” агентлагийн редактор Ричард Билтон “Путиний нууц баялаг” гэх баримтат киног бүтээж, “www.bbc.com” сайтдаа байршуулсан байна. 29 минут үргэлжлэх уг баримтат кино “www.youtube.com” сайтад нийтлэгджээ. Ганцхан өдрийн дотор  уг киног 130 мянган хүн үзэж, сэтгэгдлээ үлдээсэн байна. Билтон “Путиний нууц хөрөнгө 40 тэрбум ам.доллар. Тэрбээр манай гаргийн хамгийн баян эрхэм” гэж хэлжээ.  Энэхүү баримтат кинонд зөвхөн Путиний талаар өгүүлэхгүй бөгөөд Ерөнхийлөгчийн үнэнч туслах болон Оросын бизнес эрхлэгчид ч багтсан аж. Тэд Путинд хэрхэн хөрөнгө оруулсан, хэрхэн молигдуулсан талаараа ярьж буйгаар гарчээ.

“Путиний авлигын хэргийн талаар Вашингтоны удирдлагууд олон жилийн өмнөөс мэддэг байсан ч өнөөдрийг хүртэл амаа тагласан” хэмээн Шубан мэдэгджээ. Тэрбээр “Ерөнхийлөгч Барак Обама энэ талаар хамгийн сайн мэдэх хүмүүсийн нэг” гэсэн байна.

“Путиний нууц баялаг” баримтат киноны талаар Москвагийн талаас ямар нэгэн тайлбар хийгээгүй. Харин Шубаны ярилцлагын дараа Кремлийн хэвлэлийн төлөөлөгч Дмитрий Песков тайлбар хийжээ. Песков “АНУ-ын Санхүүгийн яам үлгэр бичиж, тэрхүү үлгэрээ бодит хэмээн олон нийтийг төөрөгдүүлэхийг оролдож байна. Энэ бол үлгэр. Бодит биш” гэж мэдэгджээ.  Барууны хэвлэлүүд Путиний хилийн чанд дахь нууц хөрөнгийн талаарх мэдээллийг нийтэлж эхэлсэн байна. Путинийг төрийн тэргүүн болсны дараа хөлбөмбөгийн “Челси” клубын эзэн Роман Абрамович түүнд 25 сая фунт стерлингийн үнэтэй дарвуулт онгоц бэлэглэж байжээ. Уг онгоцны шатахууны үнийг Оросын төрийн сангаас гардаг гэнэ. Путин жилд 4-5 удаа онгоцон дээрээ очиж, амардаг аж.  Путин Лондонд гэхэд  гурван хувийн орон сууцтай бол Европ болон Азийн орнуудад 10 гаруй харштай гэжээ.  “Путиний үл хөдлөх хөрөнгийн талаар мэдээлвэл хэдэн хуудас болно” хэмээн “www.dailymail.co.uk” мэдээлэв. Оросын сөрөг хүчний мэдээлснээр “Путин 20 гаруй сууц, 80 гаруй нисдэг тэрэг, онгоцтой” гэсэн байна.

Уг авлигын дуулианаас гадна Путинийг Британийн шүүх хүн амины хэрэгт буруутгаж буй юм.  2006 онд “полони” гэх хоронд хордож нас барсан ОХУ-ын Холбооны аюулгүй байдлын агентлагийн тагнуулч Александр Литвиненкогийн амийг бүрэлгэх тушаалыг Путинг өгсөн хэмээн Британийн шүүгч Роберт Оуэн мэдэгдээд байгаа. Кремль “Тагнуулчийн үхэлтэй Путин холбоогүй” хэмээгээд, дээрх мэдээллийг эрс үгүйсгэжээ.

Б.Дэлгэрцэцэг