ЭМС-ын сайд асан Г.Шийлэгдамба авлигын хэргээр шалгагдаж, батлан даалтад гараад байх хугацаандаа “Цензургүй яриа” нэвтрүүлэгт орж, намынхаа даргын эсрэг зүйлүүд ярьсан билээ. Тэрбээр МАХН-ын дарга Н.Энхбаяр санхүүжилт олж ир гэж гишүүдээ шахдаг учраас танил ахаасаа мөнгө авч, Н.Энхбаярт өгсөн хэмээн ярьсан.
Мөн хорих ангиас илгээсэн захиа, шахалт дарамтаар ажлаа өгсөн хэмээн ярьсантай нь холбогдуулан түүнд маш их дарамт учирч байгаа гэх мэдээлэл байна. Ярилцлагад орохоор студид ирэхэд нь хэсэг бүлэг хүмүүс түүнтэй уулзана хэмээн дайрсан гэх мэдээлэл ч бий. Иймд хуулийн байгууллагаас Г.Шийлэгдамбын амь нас аюултай байдалд байгаа, мөн гадны нөлөөллөөр амь насанд нь халдаж болзошгүй гэсэн үндэслэлээр хамгаалалтад авчээ.
Түүнчлэн өөрийнх нь бичсэн захидлыг АТГ-аас шалгахаар болжээ. АТГ-ын Хэвлэл, олон нийттэй харилцах ажилтан Т.Мөнхтунгалаг “Хэргийн нөхцөл байдал өөрчлөгдсөнтэй холбогдуулан нэмэлт ажиллагаа хийлгэхээр Г.Шийлэгдамба нарт холбогдох эрүүгийн хэргийг Нийслэлийн прокурорын газраас мөрдөн байцаалтад буцаасан. Одоо мөрдөн байцаалтын ажиллагаа үргэлжилж байгаа учраас илүү дэлгэрэнгүй мэдээлэл өгөх боломжгүй байна.
АТГ-аас МАХН-ын байрны санхүүгийн өрөөнд нэгжлэг явуулж, шаардлагатай баримтуудыг хураан авах ажиллагааг гүйцэтгэсэн. Нэгжлэгийг хуульд заасан үндэслэл, журмын дагуу прокуророос өгсөн зөвшөөрлийг үндэслэн хийсэн. Мөрдөн байцаалтын ажиллагааны үеэр тухайн байгууллагын цахим сүлжээг тасалсан, хэвийн үйл ажиллагаанд нь саад учруулсан зүйл байхгүй.
Г.Шийлэгдамбын гаргасан захидалтай холбогдуулж тодорхой нэр бүхий албан тушаалтнуудаас асууж, тодруулах ажиллагаа хийгдэж байна” гэсэн мэдээлэл өгсөн байна.
Эх сурвалж: www.mminfo.mn
Уншиж байна |