Монголын чөлөөт бөхийн холбооноос “Mongolia Open-2016” уламжлалт олон улсын тэмцээний талаар мэдээлэл хийлээ.

Хэвлэлийн бага хуралд МЧБХ-ны ерөнхий нарийн бичгийн дарга О.Баянмөнх, ДБНХ-ны техникийн төлөөлөгч, олон улсын шүүгч ноён Исао Окияма, МЧБХ-ны Шүүгчдийн зөвлөлийн дарга, тэмцээний ерөнхий шүүгч, олон улсын шүүгч Ц.Сэрээтэр нар оролцов.

МЧБХ-ны ерөнхий нарийн бичгийн дарга О.Баянмөнх “2012 онд нээлттэй УАШТ-ий хэлбэрээр анх удаа зохиогдож байсан “Mongolia Open” тэмцээн таван нас хүрлээ. Энэ тэмцээнд Гавьяат тамирчин Г.Мандахнаран завсаргүй дөрвөн удаа, Гавьяат тамирчин С.Батцэцэг гурван удаа түрүүлээд байгааг онцлон дурдмаар байна. Олимпийн жилд болж байгаа гэдгээрээ онцлогтой болж байгаа энэ удаагийн тэмцээнд манай шилдэг бөх, залуу бөхчүүд зодоглож байна. Энэхүү тэмцээнд оролцохоор БНСУ, БНХАУ-ын Өвөрмөнголын өөртөө засах орон, Индонези, Казахстан, Киргиз, ОХУ-ын Буриад, Тува, Якут улс, Калининград, Кемерово мужууд, Пермь хотын бөхчүүд хүрэлцэн ирсэн. Тэдний дотор дэлхийн хошой аварга Виктор Лебедев байна. Иймд манай тэмцээн өрсөлдөөнтэй, сонирхолтой болно гэдэгт итгэж байна" гэлээ. Ирэх амралтын өдрүүдэд болох “Mongolia Open-2016” тэмцээнд гадаадын 96 бөх, манай тамирчид нийтдээ хоёр зуу гаруй тамирчин хүч үзэх нь ээ.

Тэмцээнд жин тус бүрт түрүүлсэн бөхөд нэг мянга, хоёрдугаар байр эзэлсэн бөхөд 700, гуравдугаар байр эзлэсэн бөхөд 500 ам.долларын шагнал олгох юм байна. Энэ тэмцээнийг зохион байгуулахад зориулж Эрүүл мэнд, спортын яамнаас 40 сая төгрөг гаргасан, тэмцээний ивээн тэтгэгчээр “Үндэсний хөрөнгө оруулалтын банк” оролцож байгаа аж.

“Mongolia Open-2016” тэмцээнийг МҮОНТ, НТВ телевизээр шууд дамжуулан үзүүлнэ.

Б.Бэхи