Байгалийн гамшиг гэдэг хэлж, ирдэггүй хийсч ирдэг ажээ. Үүнийг өнгөрсөн өдрүүдэд болсон цаг агаарын аюулт үзэгдэл харууллаа. Энэ үеэр олон зуун хүн төөрч, сураггүй алга болох, хот хооронд зорчиж явсан тээврийн хэрэгслүүд цасанд олноороо боогдсон тухай мэдээллүүд ар араасаа цацагдаж байв. Харин энэ мэт сэтгэл түгшээсэн мэдээлэл дунд баярлууштай нэгэн мэдээлэл байсан нь фэйсбүүк сүлжээн дэх авто машин сонирхогчдын “Монголын Ланд круйзер” клубын залуус сайн дурын үндсэн дээр нэгдэн нийслэлийн хүрээний гадна орчинд цасанд боогдсон иргэдэд туслах зорилготой “SOS” нэртэй ажиллагааг явуулж байгаа тухай мэдээлэл байв.
Тус клубын зүгээс цаг агаарын нөхцөл байдал хүндэрч байгааг дуулаад фэйсбүүк хуудсаараа“Онцгой байдлын албаны хүн хүч, техник хүрэлцэхгүй нөхцөл байдал хүндэрвэл “Монголын Ланд Круйзер” клуб сайн дураараа үнэ төлбөргүй туслахад бэлэн. Богино долгионы холбоогоор хангагдсан ланд круйзер машинаар туршлагатай залуус Улаанбаатар хотын орчимд цасанд боогдсон хүн, автомашиныг аврах ажиллагаанд оролцож, туслах боломжтой шүү” гэдгээ мэдэгджээ.
“Монголын Ланд Круйзер” клубын залуусын зүгээс цасанд боогдсон иргэдэд тусламж үзүүлэх тухай энэ мэт уриалгад өөр бусад автомашин сонирхогчдын клубүүд ч нэгдсэн аж. Үүнд, “Монголын бартаат замын авто спортын холбоо”, “Мицүбиши пажеро”, “Прадо”, “Хайлюкс” гэх мэт автомашин эзэмшигчдийн клубүүд “SOS” ажиллагааны нэг хэсэг болж иргэдийг аварсан байна.
Тэдний тухайд нүүр нүдгүй шуурсан цасан шуурганаар Төв аймгийн Зуун мод сум, Айдсын даваа, Биокомбинат чиглэлд ажиллаж машинтайгаа цасанд боогдсон иргэдийг осгож, амь насаа алдах аюулаас аварчээ. Тэд энэ хугацаанд 47 автомашин, 102 хүний бүрэлдэхүүнтэйгээр аврах баг байгуулан ажиллахдаа нийтдээ 98 машинтай, 240 орчим иргэнд тусламжийн гараа сунгасан байна.
Эдгээр залуусын тухайд ёстой л “Тэнхлүүн явахад тэмээгээр тусалсанаас, тэвдэж явахад тэвнээр тусал” гэдэг үгийн утгыг энэ удаад бахархалтайгаар харуулж чадсанд нь даарч хөрөх, бүр амиа ч алдаж болох байсан 240 иргэний өмнөөс БАЯРЛАЛАА гэж хэлэх нь зүйтэй болов уу.
Хүчтэй хөдөлгүүртэй Ланд круйзер хөлөглөсөн монгол залуус машиныхаа ид хавыг үзэх гэж уул талаар дэмий сэлгүүцэж, чоно нохой хөөж зугаацсангүй. Харин ч хэрэгтэй цагтаа эх орныхоо иргэний үүргийг нэр төртэйгээр ухамсарлаж, өөрт байгаа боломж хүчийг ашиглаж чадсан нь зүй ёсны бахархал гарцаагүй мөн юм.
Манай зарим улстөрчийн зүгээс зуд турхантай байгаа аймгуудын малчдад лаа, шүдэнз, нэмнээ өгч тусалсан тухайгаа зурагтаар сайрхан ярьдаг. Тэдэнд уг нь ланд круйзер байтугай машин өч төчнөөрөө бий. Гэвч 76 гишүүний хэнийх нь ч толгойд машинаа өгч явуулан цасанд боогдсон иргэдэд туслах тухай яриаг гаргасангүй. Харин хэний ч санаанд ороогүйг эгэл жирийн монгол залуус энэ тухай санаж сэрсэн нь сайхан хэрэг.
Хөлбөмбөг тайлбарлагч Балжиням гуайн хэлсэн “Үүнийг л гайхамшиг гэхгүй юм бол өөр юуг гайхамшиг гэх вэ” гэх үг бий. Яг тэрэн шиг үүнийг л эх оронч үйлдэл гэхгүй юм бол өөр юуг эх оронч үйлдэл гэх вэ. Нарийн цариг, хятадын танкны тухай улстөрчдийн яриа бол үүний хажууд цаашаа юм байна.
Р.Улам-Оргих