Ойрхи Дорнодоос ирсэн дүрвэгсэд Македон улсад зөвшөөрөлгүй нэвтрэхийн тулд хилийн хамгаалалтын ханыг эвдэлсэн тухай “www.dailymail.co.uk” мэдээллээ. Олон мянган дүрвэгсэд өчигдөр 20.00 цагийн орчимд олноороо дайрчээ. Хилийн хамгаалагчид дүрвэгсдийг тараахын тулд хийн буу ашигласан байна.

Грек болон Македон улсын хилийн орчим 900 мянга гаруй хууль бус цагаачид байршиж буй юм. Дээрх орнууд аюулгүй байдлын үүднээс дүрвэгсдийг хүлээн авахаа зогсоосон билээ. Македон улсын хилийн орчимд амьдарч буй дүрвэгсдийн нөхцөл байдал хүндэрч, дээрэм тонуул, өлсгөлөн газар авч буй учир хууль бусаар хил нэвтэрсэн гэж тайлбарлажээ.

Европын холбооны хүсэлтийн дагуу дэлхийн 23 улсын удирдагч Белгийн нийслэл Брюссель хотноо дүрвэгсдийн асуудлаар хэлэлцэж байгаа юм. Уг хуралдааны үеэр Британийн Ерөнхий сайд Дэвид Камерон “Африк болон Ойрхи Дорнодоос ирж буй дүрвэгсдийг бүгдийг нь хүлээн авах нь үндэсний аюулгүй байдалд заналхийлэх болно” хэмээн мэдэгджээ.

Мөн Грекийн Ерөнхий сайд Алексис Ципрас “Дүрвэгсдийг хүлээн авах нь хэтэрхий аюултай” гэсэн байна.

Б.Дэлгэрцэцэг