Цагдаа болон тусгай албаныхан УИХ-ын гишүүн Х.Баттулгын Баянгол зочид буудалд байршилтай хоёр компани өчигдөр санхүүгийн шалгалт хийсэнтэй холбоотой дуулиан дэгдээд байгаа. Энэ үйл ажиллагааг УИХ-ын гишүүд сонгуулийн өмнөх “тусгай ажиллагаа” хэмээн эсэргүүцсэн байр суурьтай байгаа юм. Энэ талаар УИХ-ын гишүүн, МоАХ-ын дэд тэргүүн Л.Эрдэнэчимэгээс тодрууллаа.
-Өнөөдрийн АН-ын бүлгийн ээлжит бус хуралдаанаар ямар асуудал хэлэлцэхээр зарлагдсан бол?
-Өнөөдрийн бүлгийн хуралдаанаар цаг үеийн асуудлыг хэлэлцэх байх. Мэдээж Х.Баттулга гишүүнтэй холбогдох асуудлыг хэлэлцэхээр байсан. Мөн АТГ-ын даргын асуудал ч орохоор байсан.
-Х.Баттулга гишүүний компанид санхүүгийн шалгалт хийсэн асуудлыг та юу гэж үзэж байна вэ?
-Энэ бол “цэвэр тусгай” ажиллагаа байсан. Мэдээж “Тавантолгой”-н асуудалтай ч холбоотой байх. Хоёр компанид шалгалт явуулахын тулд 20 гаруй цагдаа, тусгай хамгаалалтынхныг дайчилна гэж болохгүй. Ерөнхий сайд энэ тусгай ажиллагаагаа зогсоох хэрэгтэй.
-УИХ дахь АН-ын бүлгийн “Их тэнгэр”-т хийсэн хурлаар эв нэгдэлд хүрлээ гэж байсан. Хурлын уур амьсгал ямар болсон бол?
-АН-ыг муухай харагдуулж байгаа зүйл бол эв нэгдэлгүй байгаа асуудал. Бямба гаригт болсон Их тэнгэрийн уулзалтад манай бүлгийн гишүүд бүгд ирсэн. Асуудлаа ярилцаад сонгуульдаа ялалт байгуулахын төлөө нэг зүг харцгаая. Хамгийн гол нь ард иргэдийн болон намын олон зуун мянган иргэдийн зүгээс хүсч байгаа ганц зүйл бол эв нэгдлийн асуудал. Бид өнгөрсөн дөрвөн жилийн хугацаанд хангалттай бүтээн байгуулалт хийлээ. Энэ бүхнийгээ бид эв нэгдэлгүй байдлаас болж унагаж байгаа. Тийм учраас хамтдаа гар гараасаа барилцаад эв нэгдэлтэй оролцъё, сонгуульдаа гэж хэлээд гарсан. Харамсалтай нь даваа гаригийн өглөө баривчилгаа үргэлжилсэн учраас нөхцөл байдал өөрчлөгдсөн.
-Хэрвээ асуудал хурцадвал МоАХ Засгийн газраас сайдуудаа татна гэж байсан?
- МоАХ-ны квоттой дөрвөн сайд байдаг. Энэ баривчилгаа нэгжлэг бол цагдаагийн газраас хийж байгаа ажил. Тэгэхээр цагдаагийн газрын даргыг томилдог Ерөнхий сайд цагдаагийн газрын хийж байгаа хууль бус ажиллагааг зогсоохгүй бол дөрвөн сайдаа татна гэсэн шаардлага тавьж байгаа. Хэрвээ иймэрхүү хууль бус үйл ажиллагаагаа, баривчилгаагаа ЦЕГ-аас үргэлжлүүлвэл Ерөнхий сайд ЦЕГ-ын даргаа ажлаас нь чөлөөлөхгүй бол бид сайд нараа татах асуудлыг ярина. Яагаад гэвэл ЦЕГ-ын даргыг Ерөнхий сайд томилдог.
Н.Энх