УИХ-ын чуулганы нэгдсэн хуралдаанаар Ерөнхийлөгчийн санаачлан өргөн барьсан Сонгогдсон болон томилогдсон төрийн өндөр албан тушаалтанд хариуцлага хүлээлгэх тухай болон холбогдох бусад хуулийн төслүүдийг хэлэлцэх эсэхийг шийдэж байна. Хэлэлцэж байгаа асуудалтай гишүүдийн асуулт тавьж, хариулт хэлж байгаа юм.
УИХ-ын гишүүн О.Баасанхүү:
-Хэнд хариуцлага тооцох гээд байна вэ? Нэгэнтээ сонгогдсон хүмүүст хэн хариуцлага тооцох вэ? Энэ нь сонгох эрхэд харшилж, Үндсэн хуульд зөрчилдөх юм биш үү? Сонгогдсон гэхээр ард түмэн сонгоно гэж ойлгож байгаа. Гэтэл ард түмэнд хариуцлага тооцох юм уу.
Ерөнхийлөгчийн хуулийн зөвлөх Ч.Өнөрбаяр:
-Төрийн жинхэнэ албан хаагчдын хувьд хуульд заасны дагуу хариуцлага хүлээдэг. Гагцхүү улс төрийн албан тушаал, УИХ-аас томилогддог албан хаагч нарын хувьд хариуцлагын асуудал яригдахгүй явж ирсэн. ҮХЦ-ийн шийдвэр бол өөр. Сонгуульт албан тушаалтан нь Ерөнхийлөгч, УИХ-ын гишүүд байдаг. Энэ хүмүүст хүлээлгэх хариуцлагыг Үндсэн хууль зааж өгсөн. Харамсалтай нь орхигдсоор ирсэн. Цэцийн шийдвэрийн хувьд Засгийн газрын гишүүнтэй холбоотой байгаа. Үүнд бид нарийвчлан оруулж ирсэн. Ерөнхий сайд танхимаа бүрдүүлдэг, огцруулах асуудлыг Ерөнхий сайдад нь тавьдаг байхаар оруулж ирсэн.
УИХ-ын гишүүн Ж.Батзандан:
-Энэ хууль УИХ руу олон удаа орж ирж, бас олон удаа буцаж байгаа төсөл. Ерөнхийлөгч Монгол Улсыг өөрчилье, хөгжүүлье, зарим хүмүүст хариуцлага тооцъё гэсэн хүсэл байгаа. Нийт сонгогчдын 15 хувь нь санал гаргасан тохиолдолд эгүүлэн татаж болно. УИХ-ын гишүүнийг ёс зүйн алдаа гаргасан тохиолдолд эгүүлэн татна гэж оруулсан. Энэ амьдралд хэр хэрэгжих вэ.
УИХ-ын гишүүн Л.Болд:
-Хариуцлагагүй байдлын үлгэр жишээ нь УИХ. Өнөөдрийн ирцийг хар. Байнгын хороо, чуулганы хуралдаан цагтаа эхэлдэггүй. Үүний цаана хариуцлага байхгүй учраас хурлаа тасалж байна. Гишүүнийхээ үүргийг биелүүлээгүй бол дахиж нэр дэвшихгүй байх, намаасаа хариуцлага хүлээх, цалингаасаа хасуулах хариуцлага баймаар байна. Тэгэхгүй бол хариуцлагагүй байдал улам лавширна.
Ийнхүү гишүүд үг хэлж, асуулт тавьж байна. Чуулганы хуралдаан үргэлжилж байна.
Н.Энх