1072 ширхэг хувьцааны асуудлаар “Хувьцаа эзэмшигч хөрөнгө оруулагчдын эрхийг хамгаалах төв”-ийн гүйцэтгэх захирал А.Алтаншагай мэдээлэл хийлээ. Тэрбээр 1072 ширхэг хувьцааны нэг сая төгрөгийг иргэн бүрт олгож байна гэдэг худал мэдээлэл гэдгийг хэлэв.

А.Алтаншагай хэлэхдээ “2012 онд Монгол Улсын Засгийн газраас “Эрдэнэс таван толгой” ХХК-ийн нийт хувьцаанаас 20 хүртэлх хувь 1 сая 500 мянган төгрөгийг иргэн бүрт олгох шийдвэрийг гаргасан. Улмаар эх орны хишиг иргэн бүрт уриан дор сар бүр 21 мянган төгрөгийг олгож иргэн бүрт 500 мянган төгрөгийг олгосон байдаг. Үлдсэн нэг сая төгрөгийг 1072 ширхэг хувьцаагаар олгох шийдвэр гарсан. Судалгаагаар өндөр настан, хөгжлийн бэрхшээлтэй иргэд, оюутан зэрэг 300 гаруй мянган иргэн сая төгрөгө авчээ. Үлдсэн 2 сая 500 мянган иргэн 2015 оны арваннэгдүгээр сараас 1072 хувьцааг арилжаалах эрх буюу захиран зарцуулах эрхийг олгохыг хүссэн асуултыг манай байгууллагад тавьж байна. Эдгээр иргэний өргөдлийг бид гурван сарын турш авч 1008 хүний өргөлдлийг цуглуулж Засгийн газар, УИХ-д шилжүүлсэн. Үүнээс хойш дахин 3500 хүний өргөдөл цуглараад байна. Эдгээр иргэний өргөдлийн эх хувийг Засгийн газарт хүргүүлж байна. Миний хэлэх гээд байгаа хамгийн гол зүйл нь сүүлийн үед иргэд 1,072 ширхэг хувьцааг арилжаалах эрхийг олгох асуудлаар манай байгууллагад их хандаж байна. Иймд манай байгууллагын  зүгээс иргэдийн өргөдөлд үндэслэж, 1,072 ширхэг хувьцааг арилжаалах эрхийг олгох асуудлаар Ерөнхий сайд, УИХ-ын даргад албан бичиг хүргүүлж  байна” хэмээв.

Тус албан бичигтээ “Монгол Улсын Засгийн газар, “Эрдэнэс Монгол” ХХК-ийн удирдлагуудыг Үндсэн хууль, Компанийн тухай хууль, Үнэт цаасны зах зээлийн тухай хууль, Иргэний хуулийг мөрдөж ажиллахыг иргэд хүсч байна. Хүний өмчлөх эрх зөрчигдсөөр л  байна” хэмээжээ.

Г.Тэгшсүрэн