Сэлэнгэ аймгийн Мандал сумын уугуул, Монгол Улсын аварга Г.Эрхэмбаяр урлаг, спортынхны улс төр рүү цуварч буй жагсаалтыг нэмэхээр шийдсэн тухай яриа гарах болов. Тэрбээр, өнөө жилийн сонгуулиар төрсөн нутаг Сэлэнгэ аймагтаа нэр дэвшихээр болсон сурагтай.

Аль нэг намыг түшиж үү, эсвэл бие дааж өрсөлдөх үү гэдгийг хэлэхэд эрт байгаа ч аваргын хувьд дотроо нэгийг бодож, хоёрыг сэтгэсэн нь дамжиггүй. Тиймдээ ч нутгийн улстөрч ах нартайгаа тойрог жижиг болчихвол үзээд алдахад гэмгүй хэмээн сэтгэж яваа сурагтай.

Аваргын хувьд мэдлэг боловсролын хувьд тийм ч сулхан нэгэн биш. Өнгөрсөн хугацаанд тэрбээр Удирдлагын академийг Төрийн удирдлага, менежментийн чиглэлээр төгсч, хэдхэн хоногийн өмнө дипломоо гардаад буй будаг нь ханхалсан төгсөгч.

Тиймдээ ч сэлэнгэчүүдийн итгэлийг хүлээгээд парламентад суулаа гэхэд Дархан аварга шиг төрийн түшээ болохгүй гэсэн үг биш юм. Эр хүний дотор эмээлтэй хазаартай морь багтдаг гэгчээр их улс төрд хөл тавих том хүсэл өвөртөлсөн бол аваргынхаа дээлийн захыг мушгиад л сууж байхаас өөр яалтай билээ.

Эх сурвалж: www.mminfo.mn