Төсвийн байнгын хороо өнөөдөр өглөө хуралдлаа. Хуралдаанаар Өрийн удирдлагын тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг шийдэв. Хуулийн төслийг санаачлагч гишүүн Н.Батбаяр:
-Монгол Улс зах зээлийн харилцаанд шилжээд олон жил болж байна. Хүнийг ажиллуулах хөшүүрэг бол зээл юм гэж зах зээлийн утга илэрдэг. Ажлын байрны түлхүүртэй болвол орон сууц, машины зээлтэй болдог. Үүний үр дүнд олон хүмүүс өөрийн хөрөнгөтэй болж, амьдрал ахуйгаа шийдээд явж байна. Гэтэл Монгол Улс дааж давшгүй өртэй болсон гэх ойлголт нийгэмд байна. Үнэн хэрэгтээ бид дааж давшгүй өрөнд ороогүй. Монгол утгаараа өр гэдэг үг төлж чадахаа больсон төлбөрийн хэлбэр юм. Өнөөдөр төр, засагт төлж чадахаа байсан өр байхгүй. Олон нийтийн санаа сэтгэлийг үймлээд байгаа учир Өр гэдэг үгийг өглөг гэдэг үгээр сольё. Өр гэдэг бол шинэ ойлголтыг сонгодог утгаар нь оруулж байна. Төлбөр тооцоогоо цаг хугацаанд нь төлж чадахаа байсныг өр гэнэ. Өглөг гэдэг нь төлбөр тооцоогоо хугацаанд нь төлж байгаа зүйлийг хэлнэ. Өр гэдэг бол хугацаа хэтэрсэн зээлийг хэлдэг. Монгол Улсын хувьд хугацаа хэтэрсэн зээл болон өр байхгүй. Ингэхээр нийгэмд агуулга нь зөв болно гэв.
Үүнтэй холбогдуулан гишүүд байнгын хорооны хуралдаан дээр ширүүхэн мэтгэлцэв.
Гишүүн Ч.Хүрэлбаатар:
-Батбаяр аа, өөрөөөс чинь айж эхэлж байна. Тархин доторх бодлоо өөрчлөх цэглэх ёстой, зөв болгох ёстой гэж хэлдэг. Өөрөө энэ бодлоо цэгцэл. Өөрийгөө зас, тархи толгойгоо цэгцэл. Гадаад дотоодын эдийн засгийн онолын сэтгүүлийг унш. Үг үсгээр хөөцөлддөг зүйл чинь сайн үр дагавар авчрахгүй. Бид өрийг яаж буулгах вэ. Өрийг өглөг гэж өөрчилснөөр улс орон хямралаас гарчихгүй.
УИХ-ын гишүүн Н.Батбаяр:
-Үг солиод өөрчлөгдөнө. Жишээлбэл, танай нам МАХН нэртэй байсан. Гэтэл хувьсгалт гэдэг үгийг нь хассанаас ямар үр дагавар ирлээ. Бид тусгаар тогтносон Монголын хувьд зөв ярьж зөв ухаарч явах ёстой. Үгийн зөрүү, цагийн зөрүү, үйлийн зөрүүгээ арилгах хэрэгтэй. Ингэснээр бидний амьдралд өөрчлөлт гарна. Өнөөдөр монголчууд бүгдээрээ зээлтэй байгаа. Зах зээлийн нийгэм иргэдээ зээлтэй болгох бололцоог олгодог.
Мөн Гаалийн болон Нэмэгдсэн өртгийн албан татвараас чөлөөлөх тухай хуулийн төслийг Засгийн газраас өргөн барьж хэлэлцэх эсэхийг нь шийдэв. Гишүүн Ч. Хүрэлбаатар үүнд “Сонгууль болоход 40 хоног дутуу байхад энэ хуулийг оруулж ирж байгаа шалтгаан юу вэ. Татвар өөрчлөх үндэслэлүүдээ гаргаад өгөөч” хэмээв. Харин Аж үйлдвэрийн сайд Д.Эрдэнэбат
-Үүнд сонгууль хамаагүй. Ямар ч сонгууль хамаагүй. Явдаг журмаараа яваад бодлогын хүрээнд хийгдэж байна. Надад энэ салбарын ажил хэрэгтэй. Алхам болгоныг битгий улстөржүүлээд бай гэсэн юм.
Н.Энх