Үндэсний баяр наадам болоход 10 гаруй хоногийн хугацаа үлдээд байна. Баяр наадмын үйл ажиллагаа болох төв цэнгэлдэх хүрээлэн болон Хүй долоон худгийн тохижилтын ажил үргэлжилж байна. Өнөөдөр Шадар сайд Ц.Оюунбаатар тэргүүтэй баяр наадам зохион байгуулагчид Хүй долоон худагт наадмын бэлтгэл ажилтай танилцлаа.
Үндэсний Их баяр наадмын өдрүүдэд Хүй долоон худагт Монголд үйлдвэрлэсэн 30 ширхэг цахилгаан автобус иргэдэд үйлчилнэ. Өмнөх жил 15 ширхэг цахилгаан автобус үйлчилгээнд явж байсан бол энэ жил 15-ыг нэмж явуулахаар болжээ. Харин хотын төвөөс Хүй долоон худаг руу 10 том оврын автобус явуулахаар төлөвлөж буй аж. Шадар сайд автобусны тоог нэмэх шаардлагатайг хэлсэн байна.
Наадмын үеэр Хүй долоон худагт 6000 гаруй автомашины зогсоол, 15 байршилд 30 орчим нийтийн бие засах газар ажиллуулна. Мөн цахилгаан автобусны зам дагуу 3000 ам.метр явган хүний зам шинээр тавьсан байна.
Энэ жил нийслэлийн төсвийн хөрөнгөөр шинээр 3000 сандал авсан аж. Ингэснээр 6000 сандалтай болж, Хүй долоон худагт 4000 орчим сандал байршуулахаар болжээ. Харин үлдсэнийг нь Чингисийн талбайд болох арга хэмжээ болон АСЕМ-ын үеэр хэрэглэх юм.
Уншиж байна |