Иракийн хэт даврагч “Халифын вант улс” бүлэглэл өчигдөр Йемен улсаас гадна Ливан улсад халдлага зохион байгуулсан талаар “www.dailymail.co.uk” мэдээллээ. Хэт даврагчид Ливаны христэд итгэгчдийн тосгонд нэвтэрч, халдлага үйлджээ. Халдлагаар таван хүн амиа алдаж, 15 хүн гэмтсэн байна.
Мөргөл үйлдэж байсан иргэдийн дунд хар алчууртай эр өөрийгөө егүүтгэсэн хэмээн цагдаагийн газраас мэдээлэв. Уг халдлагыг тус бүлэглэл үйлдсэн болохоо мэдэгдэж “Христийн шашинтнууд бүгд үхдэл болох ёстой” гэсэн байна.
Ливаны тусгайгийнхан уг халдлагатай холбоотойгоор Сирийн хилийн ойролцоогоос дөрвөн этгээдийг баривчилжээ. Сэжигтнүүдийн гар цүнхнээс уурхайн тэслэгч зэргийг олжээ. Цагдаагийнхан мөн халдлага гарсан тосгоныг дамжин өнгөрсөн бүх хүний мэдээллийг шүүж эхэлсэн гэнэ.
Сирид иргэний дайн дэгдсэний дараа тус улс хилийн хамгаалалтаа нэмэгдүүлж, хэт даврагчдын эсрэг тэмцэлд нэгдсэн билээ.
Б.Дэлгэрцэцэг
Уншиж байна |