АН-ын Шинэчлэлийн хөдөлгөөн, залуучуудын болон анхан шатны байгууллагын гишүүд дэмжигчдээс  мэдээлэл хийлээ. АН-ыг шинэчлэх түр хороо  байгуулагдсан байна.   Шинэчлэх түр хорооны гишүүн П.Галиндэв “АН-ыг шинэчлэх хөдөлгөөн 1.3 жилийн өмнө байгуулагдсан. Энэ намд шинэчлэл хэрэгтэйг удаа дараа хэлж байлаа. Өнөөдөр сонгуулийн дараа АН зайлшгүй шинэчлэх шаардлагатайг ард түмэн ч гэсэн хэлж өглөө. Одоо намыг шинэчлэх ажил илүү өргөн бүрэлдэхүүнтэй өрнөж байна” гэдгийг  онцоллоо.  АН-ыг шинэчлэх түр хорооныхон мэдэгдэл гаргажээ. Уг мэдэгдэлд “Монголын ард түмэн АН-д өмнөх сонгуулиар итгэл хүлээлгэж, олуулаа болох боломж өгсөн. АН олон сайн ажлыг санаачлан эхлүүлсэн. Улс орон даяар их бүтээн байгуулалтыг эхлүүллээ.  Харамсалтай нь нам дамнасан эдийн засгийн бүлэглэл доторх фракц хоорондын утга учиргүй зөрчилдөөн өөрсдийн байгуулсан Засгийн газраа огцруулж, 1996-2000 оны гашуун түүхээ давтлаа. Алсын хараагүй шийдвэр гаргаж, үнэт зүйл зарчмуудаа уландаа гишгэн, жирийн гишүүдийнхээ дуу хоолойг боож, ёс зүйн дүрэмгүй гишүүдийн түрэмгий бодлогыг дэвэргэн улс төрийн алдаатай бодлого явуулсан зэрэг нь энэ удаад АН-ыг УИХ-ын болон аймаг, нийслэлийн ИТХ-ын сонгуульд ялагдалд хөтөллөө.

Тиймээс АН-ын шинэчлэлийн хөдөлгөөнөөс санаачлага гарган, намыг шинэчлэх түр хороо зохион байгуулан намын төв байран дээр байрлах болсныг үүгээр мэдэгдэж байна хэмээжээ.  Шинэчлэлийн түр хорооныхон АН-ын дарга, Ерөнхий нарийн бичгийн дарга  нар гишүүд дэмжигчдээсээ өөрийн биеэр уучлал гуйж, өөрийн биеэр огцрох өргөдлөө 24 цагийн дотор гаргах, АН-ын Гүйцэтгэх зөвлөл ҮЗХ-г 48 цагийн дотор хуралдуулж, Намын их хурлыг наймдугаар сарын 15-ны дотор хуралдуулахыг зарлахыг шаардлаа. Цаашлаад АН-ын Шинчлэлийн түр хороонд намын Онц их хурлыг зарлан хуралдуулах, Их хурлаас ил тод нээлттэй зарчмаар шинэ удирдлагуудыг сонгох, АН-ын үндсэн дүрэмд өөрчлөлт оруулах, Гүйцэтгэх зөвлөл, ҮЗХ-г 100 хувь өөрчилж, дунд шатны байгууллагуудын хурлаар шинэ гишүүдээ сонгох эрхийг өгөхийг шаардлаа.  

Дээрх мэдэгдлийг АН-ын удирдлагууддаа хүргүүлж байгаа юм байна.

Н.Энх