Тайванийн Ерөнхийлөгч Цай Ин Вэнь нутгийн уугуул иргэдээсээ уучлалт гуйсан талаар “www.channelnewsasia.com” мэдээллээ.

Тайванийн түүхэнд анх удаагаа Ерөнхийлөгч уугуул иргэдээсээ уучлалт гуйж буй гэнэ.

Тайванийн уугуул иргэдийн амьдардаг бүс нутагт олон мянган хятадууд нэвтэрч, олноороо айлган сүрдүүлж, уугуул иргэдийн газар нутгийг хүчээр булаан авах, айлган сүрдүүлэх болжээ. Уугуул иргэд олон жилийн өмнөөс уг асуудлаар Засгийн газраасаа тусламж хүссэн ч ямар нэгэн дэмжлэг авч чадалгүй өнөөг хүрчээ. Уугуул иргэдийн амьдардаг нутгийн зүүн хэсэгт БНХАУ-ын 3-5 сая иргэн амьдарч байна. Хятадууд уугуул иргэдээс 10 дахин олуулаа юм.

Ерөнхийлөгч “Хожимдсон ч гэсэн уугуул иргэдээсээ уучлалт гуймаар байна. Засгийн газар өнөөдрөөс эхлэн уугуул иргэдийнхээ эрх ашгийг хамгаалах, алдаад буй газар нутгийг нь чөлөөлөх ажилд гол анхаарлаа хандуулан ажиллах болно. Тайвань та бүхний дэмжлэгээр байгуулагдсан гэдгийг хойч үе минь мартах учиргүй” гэж хэлжээ.

Тэрбээр ийнхүү хэлсэнийхээ дараа уугуул иргэдийн 16 омгийн тэргүүлэгчтэй дурсгалын зураг татуулсан байна.

Цай Ин Вэнь өнгөрсөн нэгдүгээр сард Ерөнхийлөгчийн сонгуульд ялалт байгуулж, өнгөрсөн тавдугаар сард тангарагаа өргөсөн билээ. Тэрбээр Тайванийн анхны эмэгтэй төрийн тэргүүн юм.

Б.Дэлгэрцэцэг