Хуульзүйн байнгын хороо хуралдлаа. Хуралдаанаар Авлигын эсрэг хуульд өөрчлөлт оруулах тухай хуулийн төслийг хэлэлцлээ. АТГ-т тасралтгүй 10 жил ажилласан албан хаагчдыг өндөр насны тэтгэвэр тогтоолгохдоо нэг удаад 36 сарын цалинтай нь тэнцэх тэтгэмж олгохоор хуульд заасан байсан. Энэ заалтыг өөрчилж, 36 сарыг 12 сар хүртэл болгон өөрчлөхөөр төсөлд тусгасан. Үүнтэй холбогдуулан гишүүд асуулт тавьж хариулт авлаа.
УИХ-ын гишүүн Б.Пүрэвдорж:
-Эдийн засгийн хямралын үед бүсээ чангалах зорилгоор түр хугацааны арга хэмжээ авч байна гэсэн. Гэтэл байгуулагдаад 10 жил болоогүй АТГ-тай холбоотой Авлигын эсрэг хуульд дахь 36 сар хүртэл тэтгэмж олгох заалтыг өөрчилж байгаа нь ямар учиртай вэ? АТГ 2008 онд байгуулагдсан. Энэ хуулийн үйлчлэлт тасралтгүй 10 жил ажилласан гэх заалтаараа 2019 онд хэрэгжихээр байна.
Сангийн сайд Б.Чойжилсүрэн:
-Төрийн албан хаагчдад нэг удаагийн тэтгэмж олгох хугацаа өөр өөр байгаа. Тиймээс жигд болгох үндэслэлээр Авлигын эсрэг хуульд өөрчлөлт орж байна. Хөнжлийнхөө хэрээр хөлөө жийх хэрэгтэй. Бид санхүүгийн сахилга батыг сайжруулахыг зорьж байгаа.
УИХ-ын гишүүн О.Баасанхүү:
-Хууль эрхзүйн үзэл баримтлал, судалгаа байна уу? Авлигын эсрэг хуулийн өөрчлөгдөж байгаа заалт бол барааг 2020 онд хэрэгжих асуудал. Дээрээс нь төрийн албан хаагчдад нэг удаагийн тэтгэмж олгоход 1-12 сар хүртэл, Авлигын эсрэг хуулиар АТГ-т тасралтгүй 10 жил ажилласан албан хаагчийг тэтгэвэрт гарахад 12 сар хүртэл сарын цалинтай тэнцэх тэтгэмж олгоно гэж заажээ Ямар нь нэг сарын, ямар нь 12 сар хүртэл цалинтай тэнцэх тэтгэмж олгох гээд байна вэ?
Сангийн сайд Б.Чойжилсүрэн:
-1-12 сарын цалинтай тэнцэх гэдэг нь ажилласан жилээс нь хамаарна. Энэ тэтгэмжийг олгох эрхийг бид төсвийн ерөнхийлөн захирагч нь тогтоохоор оруулж байгаа.
Гишүүд ийнхүү асуул тавьж, хариулт авсны дараагаар Авлигын эсрэг хуульд өөрчлөлт оруулж АТГ-т тасралтгүй 10 жил ажилласан албан хаагчийг тэтгэвэрт гарахад нь 36 сарын цалинтай тэнцэх нэг удаагийн тэтгэмж олгоно гэсэн заалтыг “12 хүртэл сар” өөрчлөлт санал явуулав. Гишүүдийн олонх нь уг өөрчлөлтийг дэмжсэн юм.
Дараагаар нь Шүүгчийн эрх зүйн байдлын тухай хуульд өөрчлөлт оруулах тухай хуулийн төслийг хэлэлцэв. Шүүгчийн цалинг бууруулахгүй байхаар МАН-ын бүлэг дээр дэмжсэнийг талаар тус байнгын хорооны дарга Ш.Раднаасэд хурлын эхэнд мэдэгдсэн юм. Үүнтэй холбогдуулан УИХ-ын гишүүн Ж.Батзандан:
-Засгийн газар ямар ч санал оруулж ирж болно. Гэхдээ УИХ хуулийн байгууллагын хэвийн үйл ажиллагааг хангах ёстой. МАН Шүүгчийн эрхзүйн байдлын тухай хуульд өөрчлөлт оруулж, цалинг бууруулахыг дэмжихгүй шийдэлд МАН-ын бүлэг хүрчээ. Хууль хяналтын байгууллагын цалинг бууруулахгүй байх нь зөв. Улс Улс орны нийгэм, эдийн засаг ямар ч хэлбэлзэлтэй байсан хуулийнхны цалинг хэлбэлзүүлж болохгүй хэмээлээ. Харин УИХ-ын гишүүн Ц.Нямдорж:
-Шүүхийн ерөнхий зөвлөл байгуулагдсанаасаа хойш бусармаг үйл ажиллагаа явуулж байна. Өнөөдөр news.mn сайт дээр захиалгат материал бичүүлжээ. Цаашид ийм ёс суртахуунгүй зүйл хийлгээд байх уу. Шүүгч нарын цалинг энэ хэвээр байлгах гэж байгаа бол төрийн албан хаагчдын шатлалаас прокурор, ҮХЦ-ийн гишүүдийг гаргаж, шүүгч нарын цалинтай адил болго. Хууль ёсыг дээдэлж, алдаа завхралыг зогсооно биз дээ гэсэн юм.
УИХ-ын гишүүн Б.Пүрэвдорж:
-Шүүгч нарын цалин нэмэгдсэнээр хоёр сайн эерэг зүйлд нийгэмд авчирсан. Хөдөөний жирийн иргэн шүүх дээр очоод хамаатан садан, танил талаараа дамжуулан шүүгч хайхаа больсон. Өөрөөр хэлбэл шүүгч нар асуудалд шударгаар ханддаг нь давамгайлсан. Мөн хуульч нар шүүгч болж, асуудлыг зөвөөр шийдээд явбал амьдрал илүү баталгаатай болно гэж үзэх хандлагатай болсон. Тийм учраас шүүгч нарын цалинг бууруулах Засгийн газрын хуулийн төслийг эсэргүүцэж байна. Нөгөөтэйгүүр Засгийн газар шүүх эрх мэдэлд халдаж, хууль зөрчиж байгааг эсэргүүцэж байгаа гэв.
Ийнхүү гишүүд асуулт асууж, үг хэлсний дараа санал хураалт явууллаа. Гишүүдийн олонхийн саналаар шүүгч нарын цалинг бууруулахыг дэмжсэнгүй.
Н.Энх