Өнгөрсөн наймдугаар сарын 31-нд Англи улсын иргэн  Стивен Нэйш гэх уулчин Монгол улсын нутаг дэвсгэрт амиа алдсан хэрэг гарсан. Тэрбээр  гадны нөлөөтэй амиа алдсан байж болзошгүй талаар Консулын газраас мэдээллээ.

Талийгаач нь ир үзүүртэй зүйлээр цээжний хөндийд хатгагдаж нэвтэрсэн шархны улмаас гадна болон дотуур цус алдаж нас барсан байх магадлалтай гэсэн урьдчилсан дүгнэлтийг Цагдаагийн байгууллагаас гаргажээ.

Хэргийг Архангай аймгийн цагдаагийн газар болон Мөрдөн байцаах газрын онц хүнд гэмт хэрэг мөрдөх хэлтсээс хамтарсан ажлын хэсэг шалгаж байгаа аж. Одоогоор тус хэрэгт хоёр иргэнийг сэжигтнээр саатуулан шалгаж, хэргийн газраас олдсон нотлох баримтуудыг шинжилгээнд өгөөд байгаа тухай цагдаагийн байгууллагаас мэдээлсэн.

Гадаад харилцааны яамны Консулын газрын зүгээс дээрх хэрэгтэй холбоотойгоор ИБУИНВУ-ын ЭСЯ-тай тогтмол харилцаатай ажиллаж байгаа аж. ЭСЯ-аас тавьсан хүсэлтийн дагуу талийгаачийн цогцсыг эх оронд нь хэрхэн хүргүүлэх болон шаардлагатай мэдээллийг тогтмол өгс байгаа юм байна.

Г.Тэгшсүрэн