Иргэн Ч.Долгормаа Монгол Улсын Ерөнхийлөгч Ц.Элбэгдоржид хандан мэдээлэл хийлээ. Тэрбээр 2014 оны зургадугаар сард УИХ-ын гишүүнээр гурван удаа сонгогдож байсан Б.Батбаярт холбогдуулан Авлигатай тэмцэх газарт гомдол гаргажээ. АТГ-аас түүнийг хохирогчоор тогтоосон аж. Гэвч өнөөдрийг хүртэл хохирлыг барагдуулаагүй  гэдгийг Ч.Долгормаа хэлэв.

Тэрбээр  “УИХ-ын гишүүнээр сонгогдон ажиллаж байсан Б.Батбаяр бид дундын эзэмшлийн компанитай. Гэсэн ч Б.Батбаяр 2014 онд бидэнд мэдэгдэлгүй, зөвшөөрөлгүйгээр  дундын эзэмшлийн компанийг ашиглан Засгийн газрын бондоос 5 тэрбумын зээл авсан. Түүнийгээ өөрийн бизнес болон өр зээлд хэрэглэсэн. Иймд бид АТГ-т 2014 оны зурагдугаар сард гомдол гаргасан. Улмаар АТГ-аас 2014 оны арваннэгдүгээр сард зөрчлийг илрүүлэн намайг хохирогчоор тогтоосон. Гэвч хэрэг удааширч эсрэгээрээ манай гэр бүлийг гэмт хэрэгтэн болгосон. Иргэн би хохироод гурван жил болж байна. Энэ хугацаанд АТГ-аас хэргийг нэг биш удаа шалгасан. 2015 оны есдүээр сард яллах дүгнэлттэй хэргийг Нийслэлийн Прокурор руу шилжүүлсэн боловч хэргийг хэрэгсэхгүй болгосон. Улмаар одоо болтол миний хохирлыг барагдуулаагүй байна.  Иргэн миний бие энэ бүхний цаана авлига байгаа гэж хардаж байна. АТГ эрүүгийн хэргийг нотлодог, харин Прокурор хэрэгсэхгүй болгодог. Энэ бол авлигын сүлжээ гэх хардлагыг надад төрүүлж байна” хэмээв.

Мөн тэрбээр “С.Баярцогтын Швейцарт сая гаруй ам.доллар нуусан нь илэрсэн. Гэтэл үүнийг огтхон ч шалгаагүй. Иймээс Монгол улсад хэнийг шалгадаг, хэнийг шалгадаггүй вэ гэдгийг ардчилсан ерөнхийлөгчөөс асуумаар байна. Авлига Төрийн тэргүүн Ц.Элбэгдоржийн төвшинд хүрсэнийг би зарлаж байна” гэв.

Иргэн Ч.Долгормаа нь "Гутал" ХК-ийн төлөөлөн удирдах зөвлөлийн гишүүн юм.

Г.Тэгшсүрэн