Хил хамгаалах байгууллагын “Хилчдийн бүтээл” үзэсгэлэн худалдаа хоёр дахь жилдээ зохион байгуулагдаж байна.

Хилийн цэргийн алба хаагчдын бүтээлийг ард иргэдэд танилцуулах зорилготой энэхүү үзэсгэлэн худалдаанд Хилийн цэргийн 30 гаруй анги, хороо оролцож байна. Оролцогч анги салбарууд ой тайгын, уулын, говь цөлийн, төвийн, тал хээрийн хилийн бүс гэсэн 5 хэсэгт хуваагдан анги салбараа сурталчлахаас гадна өөрсдийн бэлтгэж боловсруулсан хүнс болон бараа бүтээгдэхүүнийг худалдаалж байна.

Энэ жил говийн хүмүүл, таана, мангир, Сэлэнгийн утсан загас, Дадалын буриад талх, цөцгий, Халхголын зөгийн бал зэрэг нэрийн бүтээгдэхүүнийг үзэсгэлэнд дэлгэжээ.  Мөн хилийн отряд, ангийн ажилчдын гар урлал, цагаан идээ, хүнсний ногоо, эмийн ургамал, ахуйн болоод хүнсний өргөн нэрийн бүтээгдэхүүн дэлгэсэн байна.

Үзэсгэлэн энэ сарын 24,25-нд “Тусгаар тогтнолын талбай”-д хоёр өдрийн турш үргэлжлэх юм.

Г.Тэгшсүрэн