Дэлхийн гоо бүсгүйг шалгаруулдаг “Miss World” тэмцээн ирэх сарын 29-нөөс арванхоёрдугаар сарын 18-нд АНУ-ын Вашингтон хотод болно.

Тус тэмцээнд манай улсаас “Торго модель” агентлагийн загвар өмсөгч, мисс А.Баярцэцэг оролцохоор болжээ. Тэрбээр дэлхийн миссийн тэмцээний тайзнаа Монгол улсыг төлөөлөн алхах 12 дахь гоо бүсгүй болж буй юм.

Тэрбээр өнгөрсөн жил Австрийн нийслэл Вена хотноо болсон “Miss Earth-2015” тэмцээнд эх орноо төлөөлөн оролцож, шилдэг 16-д шалгарч байв. Мөн АНУ-д жүжигчний мэргэжлээр ажиллах хугацаандаа “Марка Поло” киноны хоёрдугаар ангийн  Хөхчин хатны ордны бэлэвсэн бүсгүйн дүрд тоглосон. Түүнчлэн ирэх онд нээлтээ хийх Юан гүрний үед амьдарч байсан Хотол Цагаан Сарангэрэлт гүнжийн тухай өгүүлэх “Хотлун гүнж” монголын уран сайхны түүхэн кинонд гүнжийн дүрд тоглохоор сонгогдсон.

Манай улс дэлхийн миссийн тэмцээнд “Miss world Mongolia” тэмцээний тэргүүн байрын шагнал хүртсэн гоо бүсгүйг оролцуулдаг. Харин  “Miss Mongolia” тэмцээнд оролцож ялагч болсон бүсгүй “Miss international” тэмцээнд, “Miss world Mongolia” тэмцээний дэд байрын шагналыг хүртсэн гоо бүсгүй “Эх дэлхийн мисс” тэмцээнд эх орноо төлөөлөн оролцдог байна.

Г.Тэгшсүрэн