АН-ын даргын сонгуульд нэр дэвшигчид үнэмлэх гардуулах ёслолын арга хэмжээ боллоо. Тус намын даргад УИХ-ын гишүүн С.Эрдэнэ, Д.Эрдэнэбат, Ж.Батзандан, Ерөнхий сайд асан Н.Алтанхуяг, УИХ-ын гишүүн асан Л.Гантөмөр нар өрсөлдөхөөр сонгуулийн хороонд бүртгүүлээд байсан юм. Тэдэнд нэр дэвшигчийн үнэмлэх болон эв нэгдлийг бэлгэдсэн таван сумыг гардуулан өгөв.

Ёслолын арга хэмжээний үеэр нэр дэвшигчид үг хэлэв.

Нэр дэвшигч С.Эрдэнэ: Бид өнөөдөр АН-ын шинэчлэлийн аянд гарч байна. Энэ сонгууль, сунгааг бидний дотоодын өрсөлдөөн гэж битгий хараасай. Энэ бол бидний шинэчлэлийн төлөө оруулж буй хувь нэмэр, хамтын зүтгэл юм. Тиймээс ард иргэд, намын гишүүд, сонгуулийн байгууллага энэ өрсөлдөөнд тэгш, шударга хандаасай гэж хүсч байна. Журмын нөхдөдөө, 21 аймаг, 9 дүүрэг, 338 сум, 152 хорооны үүр, дарга, гишүүдэд амжилт хүсье. Энэ өрсөлдөөнд энэ ч ялсан би АН-ынхаа шинэчлэлийн төлөө, ирээдүйн амжилт, ялалт, эх орныхоо сайн сайхны төлөө зүтгэх болно.

Нэр дэвшигч Д.Эрдэнэбат: Намын даргын сунгаанд оролцох эсэхдээ би хувь хүнийхээ төлөө эргэлзсэн. Эрдэнэбатаа, чи намын даргын сунгаанд оролцох чинь энэ намын нэр хүндийн асуудал гэсэн шаардлагыг манай гишүүд, дэмжигчид тавьсан учраас би оролцож байна. Ардчиллын үнэлэмжийг дээшлүүлэх, ардчилсан төрийн баталгааг хангах, АН-ын шинэчлэлийг цоо шинэ суурин дээр авч явах шаардлага тулгарч байгаа учраас би энэ сунгаанд оролцож байна.

Нэр дэвшигч Л.Гантөмөр: АН-ын даргын сонгуулийн ажлыг зохион байгуулахад асар их зардал гарч байгаа. Энэ зардлыг хуваалцсан журмын олон нөхөддөө, найзууддаа талархал илэрхийлж байна. УИХ-ын сонгуулийн их ялагдлын дараа АН-ын гишүүн бүр нэгийг эргэцүүлж, хоёрыг тунгаасан. Яавал АН-ыг олны итгэл хүлээсэн нам болгох вэ гэдгийг хүн бүр бодсон. АН гишүүдийнхээ нам болоосой гэдгийг чин сэтгэлээсээ хүсч байна. Хүний нөөцийн зөв бодлоготой нам болоосой гэсэндээ би энэ сунгаанд нэрээ дэвшүүлж байгаа.

Нэр дэвшигч Ж.Батзандан: АН-ын шинэчлэл эхэлж байна. АН яагаад шинэчлэгдэх ёстой вэ гэж олон хүн асууж байна. Монголыг шинэчлэх шаардлагатай байгаа учраас  АН шинэчлэгдэх ёстой. Монгол төр шинэчлэгдэх ёстой учраас АН-д шинэчлэл шаардлага байна. АН хаалттай байх уу, нээлттэй болох уу гэдгийг энэ шинэчлэлээр бид шийднэ. Өнөөдрийг хүртэл 8 жил АН хаалттай байсан. Бүх дотоод сунгаагаа бид 8 жил зогсоосон. Одоо үүнийг эцэс болгоё.  АН бүх цонх, үүд хаалгаа ард түмний өмнө нээх ёстой. Нээлттэй нам болгох бодлогыг Батзандан барьж байгаа гэдгийг та бүхэндээ хэлье. АН эрх чөлөө, хүний эрх, шударга ёсны төлөө нам байх ёстой. Энэ сунгаанд хэн ч ялсан миний бие хүлээн зөвшөөрч, хүндэтгэлтэй хандаж, хамтдаа явах болно гэдгээ хэлье.

Нэр дэвшигч Н.Алтанхуяг: Монгол орон, АН-ыг шинэчлэх шинэчлэлд нэр дэвшиж байгаа гарын таван хуруудаа баяр хүргэе. Би АН-ын даргад нэр дэвших шийдвэрийг их тулгуу гаргалаа. Хойшлуулж боломгүй энэ цаг хугацаанд намын даргад нэр дэвших шийдвэрийг журмын нөхдийн санал хүсэлтээр гаргалаа. Одоо намаа гэсэн сэтгэл зүрхтэй хүмүүс асуудлаас зугтааж, араар орох бус ахмад, дунд үе, залуус гар гараасаа барилцаад, намынхаа төлөө улмаар Монгол Улсынхаа төлөө хамтдаа зүтгэх цаг  болсныг олон хүн надад хэлсэн. Тиймээс би олон хүний саналыг хүлээн авч дутуу үлдээсэн зүйлээ дуусгая, ардчиллаа хамгаалъя, Монголдоо иргэн бүр сайхан амьдрах нөхцөлийг бүрдүүлэхийн тулд нэрээ дэвшүүллээ. АН-ын даргын сунгаа зөвхөн манай намын дотоод асуудал биш. Энэ бол нийт монголчуудын асуудал. АН-ын шинэчлэл бол Монголын шинэчлэл. Тиймээс бид энд гар бие оролцохыг хүссэн юм.

В.Бат