ОХУ-ын Батлан хамгаалах яамны “ТУ-154” онгоц өчигдөр Сочи хотоос хөөрөөд хэдхэн минутын дараа радарын дэлгэцнээс алга болсон юм. Онгоц хуваарийн дагуу Сирийн Латакиа мужид очихоор төлөвлөж байжээ.
Гашуудал зарлав
Осолтой холбогдуулан Ерөнхийлөгч орон даяар гашуудал зарлав. Тэрбээр Казакстаны Ерөнхийлөгчийн хамтаар хохирогчдын гэр бүлд эмгэнэл илэрхийллээ.
Амиа алдагсдын ихэнх нь уран бүтээлчид байжээ
“ТУ-154” онгоцонд багийн найман гишүүнээс гадна 84 хүн зорчиж явжээ. Онгоцонд ОХУ-ын Зэвсэгт хүчний алдарт Александровын чуулгын 64 найрал дуучин, хөгжимчин зорчиж явсан байна. Мөн уран бүтээлчдээс гадна Оросын “Орт 1” сувгийн есөн сэтгүүлч зорчиж явсан аж.
3000 гаруй аврагч ажиллаж байна
Хар тэнгисийн эрэг дээр онгоц осолджээ. Ослын газар 3000 гаруй аврагчид ажиллаж байна. Өнөөг хүртэл цогцсуудыг эрэн хайсаар байгаа юм.
60 цогцсыг уснаас гаргалаа
Аврагчид ослын газраас 60 цогцсыг олж, таних ажиллагааг эхлүүлсэн талаараа хэвлэлийнхэнд мэдэгдлээ. Онгоц далайд осолдсон учир цогцос олох ажиллагаагаа удааршиж буй талаар албаныхан өгүүлэв.
Хар хайрцагны бичлэгийг олжээ
Ослын гол гэрч болох хар хайрцагны бичлэгийг олсон талаар аврах албанаас мэдээлэв.Онгоц осолдохоос өмнө ахмад “Үзэгдэх орчин тааруу байна. Газардах зөвшөөрөл олгоно уу. Эсвэл өөр хот руу нисэх шаардлагатай байна” хэмээн төв станцдаа мэдээлжээ. Хар хайрцагны мэдээллийг тайлах ажиллагаа үргэлжиж байна.
Ерөнхий сайд ослын шалтгааныг олно
Ерөнхий сайд Дмитрий Медведев онгоц ямар хүчин зүйлийн улмаас осолдсон болохыг тогтоох ажлын хэсгийн ахалж байна. Тэрбээр өнөөдөр ослын газарт очиж, нөхцөл байдалтай биечлэн танилцана хэмээн Кремлийн хэвлэлийн албанаас мэдээлэв.
Нөхөн төлбөр олгоно
Хохирогчдын гэр бүлд тус бүр нь нэг сая рублийн нөхөн төлбөр олгохоор болжээ. Энэ талаар ОХУ-ын Нийгмийн даатгалын санийн хэвлэлийн албанаас мэдээллээ.
20 гаруй орны тэргүүн эмгэнэл илэрийллээ
“ТУ-154” онгоцны осолтой холбогдуулан дэлхий 20 гаруй орны удирдагчид ОХУ-ын Ерөнхийлөгчид эмгэнэл илэрхийлээд байгаа талаар Кремлийн хэвлэлийн төлөөлөгч Дмитрий Пексов уламжлав.
Б.Дэлгэрцэцэг