Сирид үргэлжиж буй хямрал, иргэний дайныг дуусгавар болгох зорилгоор олон улсын төлөөлөл өнгөрсөн онд Швейцарийн нийслэл Женев хотноо дээд хэмжээний уулзалт зохион байгуулсан боловч тодорхой үр дүнд хүрээгүй улмаас өнөөдрийг хүртэл уг уулзалт гацаад байсан юм.
Тэгвэл НҮБ-ын зуучлал дор уг “Женев”-ийн уулзалт өнөөдрөөс үргэлжлэхээр болсон талаар НҮБ-ын Сирийн асуудал хариуцсан тусгай төлөөлөгч Стаффан де Мистура мэдэгдлээ.
Тэрбээр сэтгүүлчдэд “10 сар орчим гацаад байсан Женевийн уулзалт дахин эхэллээ. Энэ уулзалтаар Сирийн хямралыг зогсоох үр дүнтэй алхам хийх болно. Гэхдээ эхний ээлжинд сөргөлдөгч талууд болох Засгийн газар болон босогчдын удирдлагуудыг эвлэрүүлэх. Энэхүү үйл явц үр дүнтэй болсон цагт уг уулзалт цаашаа хэрхэх нь тодорхой болно” гэж мэдэгджээ.
АНУ, ОХУ, Иран, Саудын Арабын эрх баригчид тохиролцсоны үр дүнд өнгөрсөн “Женев”-ийн уулзалтаар армийнхны хяналтад байгаа Сирийн хотуудад гал зогсох гэрээг амжилттай байгуулсан юм.
Гэхдээ уг гэрээний хэрэгжилт тун муу байгааг Мистура онцолжээ.
“Зөвхөн хөрсөн дээр буух үр дүнтэй гэрээг байгуулах болно. Цаасан дээр ямар ч сайхан зүйлсийн талаар бичсэн энэ бүхэн үр дүнтэй ажил болохгүй бол ямар ч хэрэггүй” хэмээн тэрбээр мэдэгдэв.
“ОХУ-ын Засгийн газар Сирийн Ерөнхийлөгч Башар аль Ассадад хандан галаа зогсоохыг уриалах болно” хэмээн тус улсын Гадаад хэргийн сайд Сергей Лавров хэллээ.
Б.Дэлгэрцэцэг
Уншиж байна |