Чингэлтэй дүүргийн цагдаагийн нэгдүгээр хэлтсийн алба хаагчид төрүүлсэн үрээ төөрүүлж хаясан этгээдийг эрэн сурвалжлан олж, эрүүгийн хэрэг үүсгэн шалгаж байна.

Өнгөрсөн дөрөвдүгээр сарын 17-нд тус хэлтэст “Бөмбөгөр” худалдааны төвд хүүхэд төөрсөн байна” гэх мэдээлэл иржээ.  Мэдээллийн дагуу шалгахад 24 настай эмэгтэй Ч, эрэгтэй С нар нэг ой долоон сартай У охиныг “Бөмбөгөр” худалдааны төв дотор төөрүүлж орхиод зугтаасныг хяналтын камерын тусламжтай тогтоосон байна. Улмаар Ч, С нарыг олж баривчилж, Эрүүгийн хуулийн 117.1 д зааснаар эрүүгийн хэрэг үүсгэн шалгаж эхэлжээ. Гэмт  этгээдүүдийг цагдан хорих 461 дүгээр ангид хорьж шалгалтын ажиллагааг явуулж байгаа аж.

Урьдчилсан шалгалтаар У охиныг төрүүлсэн Ч нь С-тэй хамтран амьдрахын тулд охиноо төөрүүлж хаясан нь тогтоогдсон байна.

Эрүүгийн хуулийн 117 дугаар зүйлийн 1-т төрүүлсэн болон үрчлэн авсан хүүхдээ хаясан, төөрүүлсэн бол хөдөлмөрийн хөлсний доод хэмжээг 51-250 дахин нэмэгдүүлсэнтэй тэнцэх хэмжээний мөнгөөр  торгох, 251-300 цаг хүртэл хугацаагаар  албан ажил хийлгэх, эсхүл  гурваас дээш зургаан сар хүртэл  хугацаагаар баривчлах ял шийтгэнэ. Харин 117.2-т энэ хэргийн улмаас хүүхдийн амь нас хохирсон, бусад хүнд хор уршиг учирсан бол таван жил хүртэл хугацаагаар хорих ял шийтгэнэ гэж заасан байдаг.

Г.Тэгшсүрэн