Ажилдаа хариуцлагагүй хандсан гэх үндэслэлээр БСШУС-ын сайдын албан тушаалаас Ж.Батсуурийг чөлөөлөн огцруулсантай зэрэгцэн дараагийн сайдын асуудал яригдаж байна.  Засгийн газрын гишүүнийг огцруулах асуудлыг хэлэлцэх үед гишүүдийн зүгээс зөвхөн боловсролын салбар гэлтгүй төрийн албанд  хариуцлагагүйн зуд нүүрлэсэн, ялзарсан гэдгийг шүүмжилж байв. Дараагийн шатанд сайдынхаа удирдлагад ороогүй, нэгдсэн бодлогод зангидагдаагүй газар, хэлтсийн дарга нарт ч хариуцлага тооцохыг Засгийн газарт санууллаа.

Одоогийн байдлаар БСШУСЯ  "эзэнгүй айл" шиг болж байгаа нь үнэн. БСШУС-ын сайд Ж.Батсуурийг огцруулж, дэд сайд Ё.Отгонбаярыг АНУ-д суух Элчин сайдаар томилсон.  Тиймээс хариуцлага алдсан салбарын сайдын нэгнийг нь огцруулан шийтгээд , нөгөөг нь шагнаж болж байна уу гэдгийг ч гишүүд сөхөж байлаа.  Гэхдээ хуулиараа БСШУС-ын сайдыг ЗГХЭГ-ын дарга түр орлон гүйцэтгэдэг заалттай аж. Тиймээс БСШУС-ын дараагийн сайд томилогдтол ЗГХЭГ-ын дарга Ж.Мөнхбат үүрэг гүйцэтгэгчээр ажиллана.

Ерөнхийлөгчийн сонгуулийн кампанит ажил өрнөсөн энэ үед МАН Засгийн газрын нэг гишүүнээрээ хариуцлага тооцдог “нэр зүүн” огцруулж байгаа нь улс төрийн тоглолт гэж үзэх хэсэг байна.  Нөгөө талаас “ажилдаа хариуцлагагүй алдсан дараагийн сайд нарыг ч огцруулах хэрэгтэй БХ-ын сайд Б.Бат-Эрдэнэ, ЭМ-ийн сайд А.Цогцэцэг нарт хариуцлага тооцож огцруулах” гэх дэмжих хэсэг ч байгаа юм.

Харин одоо БСШУС-ын сайдаар хэн томигдох вэ гэдэг асуулт олны анхаарлыг татаж байна. Засгийн газрын танхимын дан дээлтэй сайд нарын нэг нь БСШУС-ын сайд асан Ж.Батсуурь байсан. Харин эдүгээ томилогдох тус салбарт томилогдох магадлалтай сайдаар УИХ-ын гишүүн Ц.Цогзолмаа, УИХ-ын гишүүн асан Т.Ганди, Т.Бадамжунай   зэрэг нэрс явж байна. Мөн дэд сайдаар НИТХ-ын төлөөлгч Г.Ганбаярын нэр эртнээс сонсогдсон.  Гэхдээ УИХ дахь сөрөг хүчний бүлгийн дарга Д.Эрдэнэбат  сайдыг огцруулах асуудлыг хэлэлцэх үед ““Номхон тэмээг ноолоход амар” гэдэг шиг Ж.Батсуурь сайдыг огцруулах асуудалд мөн ч олон зүйл бодогдож байна. Ж.Батсуурь дан дээлтэй сайд байсан. Ж.Батсуурь сайд намдаа ганцаарджээ. Ж.Батсуурь сайдыг огцрууллаа гэхэд дараагийн сайд ”давхар” дээлтэй байхгүй шүү” гэдгийг онцолсон.

Эрх баригчдын  хувьд сөрөг хүчний зүгээс тавьж байгаа шаардлагыг хүлээж авах нь юу л бол.  Хамгийн гол нь Удирдах зөвлөл,бүлэг дээрээ санал нэгдсэн бол Ерөнхий сайдын зүгээс өргөн барьж,   томилно.  

Уг нь Ерөнхий сайдын бүрэн эрхийн хүрээнд танхимын гишүүний нэрээ өөрөө санал оруулдаг хуулийн заалттай. Гэхдээ энэ заалт хэлбэр төдий хэрэгжсээр ирсэн. Өнөөдрийн тухайд БСШУС-ын сайдын нэрийг УИХ-д Ерөнхий сайд өөрөө  санал болгох хэдий ч БСШУС-ын сайдад хэнийг томилохыг эрх баригч хүчин МАН-ын  Удирдах зөвлөл шийдэж,  УИХ дахь намын бүлгээсээ дэмжлэг авна.

Гэхдээ Засгийн газрын гишүүнийг огцруулж, томилж байгаа энэ асуудал эрх баригч хүчин МАН-ын хувьд зөвхөн эхлэл.  Ерөнхийлөгчийн сонгуулийн үр дүн хэрхэн гарахаас үл хамаарч хариуцлага алдсан эрхмүүдтэй тооцсоор байхаа үүгээр харуулж  байгаа юм.

Н.Энхлэн