Өчигдрийн Засгийн газрын хуралдаанаас гаргасан зарим шийдвэрийн талаар Засгийн газрын хэрэг эрхлэх газрын дарга Ж.Мөнхбат тайлбар өглөө.
Төсвийн орлого 500 тэрбум төгрөгөөр давсан
Өчигдрийн Засгий газрын хуралдаанаар хүүхдийн 20 мянган төгрөгийн нөхөн олгохоор шийдвэрлэсэн. Энэ талаар сайд Ж.Мөнхбат “ОУВС-гаас тавьсан шаардлагын дагуу хүүхдийн мөнгийг хязгаартай олгосон. ОУВС-гийн хөтөлбөрт хамрагдах хүсэлт гаргаж байсан тэр үед Монгол Улсын эдийн засаг хасах үзүүлэлттэй байсан. Бас маш тулгуу төлөх хэд хэдэн том өр байсан. Энэ өрийн заримыг нь төлж, нөгөө хэсгийг эдийн засагт дарамт болохгүйгээр зохицуулалт хийснээр эдийн засагт эерэг үзүүлэлт гарч, хөрөнгө оруулагчдын итгэл сайжирсан. Үүний тод жишээ нь валютын ханшийн сулрал. Өнөөдрийн байдлаар Монгол Улсын эдийн засаг 4-4.5 хувийн өсөлттэй явж байна. Сүүлийн 4-5 жилийн хугацаанд анх удаа төсвийн орлого 500 тэрбум төгрөгөөр давсан байгаа. Эдийн засгийн өсөлт, орлогын нэмэгдлийн үр шимийг Монголын өрх бүр хүртэх ёстой. Энэ үүднээс хүүхдийн мөнгийг хүүхэд бүрт олгох шийдвэрийг гаргасан. Энэ шийдвэрийн дагуу 2017.01.01-нээс хойш хүүхдийн мөнгөө аваагүй хүүхдэд мөнгийг нөхөн олгоно. Хүүхэд бүрт мөнгө олгоход жилд 100 орчим тэрбум төгрөгийн эх үүсвэр шаардагдана. Нөхөн олголтод энэ онд 161 орчим тэрбум төгрөгийг тавьж өгсөн. Үүнээсээ олгоод өгөх бүрэн боломжтой” гэсэн тайлбарыг өглөө.
Засгийн газар, УИХ-ын тогтоол бол шоу биш
Эрдэнэтийн 49 хувийг УИХ-ын сонгуулийн үеэр ард түмэн мэдээгүй байхад хувьд зарсан. Энэ асуудлыг УИХ, Засгийн газарт ярьж, 100 хувь төрийн мэдэлд шилжүүлэн авсан. Өчигдрийн Засгийн газрын шийдвэр бол Эрдэнэтийн 49 хувийг 100 хувь төрийн мэдэлд авсан гэдгийг дахин баталгаажуулж байгаагийн илрэл. Засгийн газрын тогтоолоор баталгаажуулсан.
Эрдэнэтийн 49 хувиас Монголын иргэн бүрт хувь эзэмшүүлэх шийдвэр гаргаж, яаралтай зохион байгуулахыг Сангийн яам, ТӨБЗГ-т үүрэг өгсөн. Төрийн өмчид ирж байгаа хувиас иргэн бүрт хувьцаа олгоно. Засгийн газар, УИХ-ын тогтоол бол шоу байдаггүй. Засгийн газрын тогтоол хэрэгжих ёстой. Харин хэрэгжүүлээгүй холбогдох байгууллага, албан тушаалтан хариуцлага хүлээх хуулийн заалттай. Энэ улс төрийн популизм, шоу биш гэсэн мэдээллийг хийлээ.
В.Бат